ЦIуссалакрал райондалия лак ЦIуминалийн бизан баврил ва Аухуллал район цIу дуккан даврил масъалартталсса буллалисса ДР-лул ХIукуматрал управлениелул хъунама МахIаммад-ХIажи Айдиев хьунаавкьунни ишбажаранчитуращал. БатIаврил мурад бия ЦIуминалийсса ЦIуссалакрал райондалий тIитIлатIисса мукьвагу садикран оргтехника, халичартту ва игрушкартту машан ласун кумаг баву.
ДакIнийн бутанну, уттигъанну Республикалул бакIчинал дурсса Оперштабрал батIаврий кIицI лавгун бивкIшиву сентябрьданул 1-нний тIитIлатIисса садикирттан аьркинмур диялну машан къаларсшиву. Мунин сававгу хьуну дур садикирттансса сметалуву лях ларгун диркIшиву цаппарасса аьркиншиннардансса харжлугъ.
Тагьаргу хIисаврайн ларсун, ишбажаранчитурал цивппа кумагрансса харжлугъ дишин хIадурну бушиву бувсунни.
Дугърисса тIул дурсса ишбажаранчитурахь барчаллагь увкунни Мах1аммад-Х1ажи Айдиевлул.
– ДакI ххари дунни ва масъала анаварсса мутталий дузрайн буккан бан кабакьу бувсса ишбажаранчитурал. КIицI лаган ччай ура ттинингу жу дуллалисса давурттал махъ бушиву укун уздансса, иш багьний чIарав бацIан хIадурсса инсантал, – увкунни ванал.
Спонсортурал садикирттан кумагран дартIсса 900 азарда къуруш арцул Айдиевлул цинявннал хьхьичI дуллунни ЦIуссалакрал райондалул КIулшивуртту дулаврил управлениелул хъунаманал хъиривмур Аида Джиржисовахьхьун. Вай арцух машан ласунтIиссар садикирттансса компьютерду, игрушкартту, халичартту ва цамургу кьай-кьуй. Яларай ришлай буру кумаг бувсса ишбажаранчитурал цIарду.
1. «Сепаратор» ЗАО-рал директор, МахIаммадлул арс ХIасан ХIасановлул 100 азарда къуруш;
2. «Нафта-24» автозаправкардал каялувчи, ХIажинал арс Альберт Аьлиевлул 300 азарда къуруш;
3. «Водаком» ООО-рал каялувчи, Каримуллагьлул арс Билал Узаловлул 150 азарда къуруш;
4. Ишбажаранчи, Шихамирдул арс Фрунзе Айдиевлул 100 азарда къуруш;
5. АьвдурахIманнул арс МахIаммад Аьбдуллаевлул 100 азарда къуруш;
6. «Вымпел» ООО-рал директор, Оьмал арс Оьмар Жалаловлул 150 азарда къуруш.
Имара Саидова
