Октябрь зурул 22-23-нний «Культура России» Федерал программалул лагрулий Дагъусттаннайн бувкIунни Аьшттарханнал ТЮЗ (Театр юного зрителя). Ми кьамул бунни Лакрал театрданул коллективрал.
Зулайхат Тахакьаева
Аьшттарханнал ТЮЗ-рал Дагъусттаннал чIава тамашачитуран ккаккан бунни, оьруснал халкьуннал магьа гьануну лавсъсса, хъинну яргсса, мяъна-мурадрал вибувцIусса, оьрчIан хIаз бизансса спектакль «Коза-дереза». КIира кьини Лакрал театрданул зал шапI куну бувцIуну бия 3-12 шинал оьрмулувусса оьрчIал. Театр цуппагу бия миннал тяхъасса чIурдал ласавай. ОьрчIру сахIналий хъанахъимунивух хIала-гьурттуну бия, щялмахъчи кьяцлуйн дяъвай бия, кьяцлул авара бувсса къари-къужлуй ва гайннал арснал душний цIими буллай бия. Спектакльданийн бувкIун бия МахIачкъалаллал ва Новостройрал школарттал мюрщими классирттал дуклаки оьрчIру.
Спектакльдания мукьах Лакрал театрданул каялувчинал къатлуву хьуна пресс-конференция. Завлит Гулизар Султановал цилва ихтилатраву кIицI лавгуна актертураща бювхъушиву жулва мюрщултрайн куртIсса асар биян бан, актертурал тамашачитуращалсса дахIаву ца лахIзалийссарагу дякъалирчIшиву ва спектакль ца янил ляпI учиннин къуртал хьушиву.
Аьшттарханнал ТЮЗ-рал каялувчи, Аьрасатнал халкьуннал артист Юрий Кочетковлул бувсуна театрданул тарихрая, хьхьичIунсса актертурая, репертуардания. Ва театрдануву зий ванал хьуну дусса дур 50 шин, миннува 40 – художествалул каялувчину. Муниннин зий ивкIун ур директорну. Театр бусса бур, Аьрасатнаву бакъасса, щалла дунияллийсса оьрчIал театрдава ца яла бугьарамур. Художествалул ва тарбиялул мурад биттур буллалисса цалчинсса театр сакин бувну бусса бур А. Брянцевлул, хъирив — Наталия Сацлул. Зувилку шиннардия мукьах мукунсса театрду тIивтIуну бур Аьрасатнал цаймигу шагьрурдай.
Аьшттарханнай бусса бур актертурал кIулшиву ласайсса магьирлугърал училище. КIира шинал хьхьичI, Культуралул министерствалийн ва цайми лавайсса кIанттурдайн бувккун, тIалав бан бювхъуну бур Аьшттарханнал консерваториялучIа ларайсса кIулшиву ласайсса театрал отделение тIитIин. Мунил каялувчинугу усса ур Юрий Кочетков. Каялувчинал бусласимунийн бувну, театрданул репертуар дусса дур лап авадансса.
Так ца Аьшттарханнал ТЮЗ-рал бакъассагу, щалвагу билаятрайсса буруккинну Юрий Кочетковлул кIицI лавгунни оьрчIансса пьесарду чичлачисса драматургтал гьарзасса бухьурчагу, чIаважагьилтурансса пьесарду бувагу чичлай бакъашиву. Тайннал театрданул тамашачиталгу хъунмурчIин бушиву 7-8-ми классирттал дуклаки оьрчIру. Мунийн бувну учIан увну ур жагьилсса тамашачитурал дайкIниймур ласун бюхъайсса оьрмулул режиссер.
— Архангельскаллал театрдануву бивхьусса «Пираньи» спектакль ххал бувкун, бувчIуна гьамин гана га режиссернаща бюхъантIишиву, театрдануву зузисса жагьилтуращал бакъассагу, дуклаки оьрчIащалгу маз лякъин. Мукун хьугу-хьуна. Га школарттайх уклай, дуклаки оьрчIащал ихтилат буллай, гайннал буруккинттащал кIул хьуна. Репетициярттугума школарттайва дуллай ия. Пьесагу хасну жагьилтуран цIа куну чичин бувссия Москавуллал жагьилсса чичул. Цалчинсса пьеса бухьурчагу, ганал га чивчунни жун аьркинсса куццуй. Жагьилтал театрданувун кIункIу хьунни. ЧIярусса отзыврду дуркIунни. Спектакльданун цIа дуссия «Селфи» — мунил мяъна-мурадраву ккаккан дурну дуссар жагьилтурал автопортрет.
Гьай-гьай, хъунмур къулагъас классикалул произведениярттах дуллай буру — Шекспир, Мольер, Островский, Гоголь, — увкуна Юрий Кочетковлул.
ДР-лул лайкь хьусса артистка, Оьруснал паччахIлугърал театрданул актриса Светлана Рассохинал бувсуна цуппагу зий бивкIшиву Аьшттарханнал ТЮЗ-раву, театр цинма хIакьсса школану хьушиву.
Оьруснал театрдануву ялагу зий бусса бур Аьшттарханнал ТЮЗ-раву актершиврул усттаршиву лархьхьусса цIанихсса актрисахъул – Люба Данилова, Кораблина, Потапушкина.
