Октябрьданул 22-нний Ваччиял шяраву, райондалул библиотекалуву, дунни жула цIа дурксса, кIийла СССР-данул Виричу хьусса АхIмад-Хан Султан увну 95 шин бартлаглагисса кьинилун хас дурсса литературалул вечер.

Му дурну дия Ваччиял ва ЧIяйннал школарттал учительтурал, дуклаки оьрчIал ва библиотекалул зузалтрал кумаграйну. ЧIяйннал школалул дуклаки оьрчIава гьуртту хъанай бия Сутаева Гуржигьан, ХIаммаккуева Юлиана, Сутаева Гулмира ва ХIаммаккуева Басират. Ваччиял школалул дуклаки оьрчIава гьуртту хъанай бия 4-5-ми классирттал дуклаки оьрчIру. ОьрчIру хIадур бувну бия учительтурал — Кьурбанаьлиева Зульфиял ва Мустапаева ПатIиматлул. Библиотекалул чулуха вечерданий гьуртту хъанай бия библиотекалул директор ХIажиаьлиева ПатIимат, библиотекалул зузала Исякьова Аьйшат. Вечер дачин дурну бия Аьлилова Шавлухъ.
ЧIяйннал школалул дуклаки оьрчIал бувсуна АхIмад-Хан Султаннул дяъвилул шиннардий дурсса виричушиврия, ванал гьаваллавусса талатавурттаву цалалу дуртшиву душманнал 30 самолет ва цайминнащал – 19 самолет. Мукунма бувсуна ванал душманнал чIярусса эшелонну ппив дурну диркIшивугу. КIицI бувна Виричунал оьрмулувасса цаймигу затру.
Ваччиял школалул дуклаки оьрчIал бувккуна Виричунал хас бувсса оьрус мазрайсса ва лакку мазрайсса шеърирду. Ххуйсса ихтилат бувна Ккуллал райондалул бакIчинал маслихIатчи ва пресс-секретарь Хизриев Шамххаллул.