МухIаррам барз бусурманнал календарьданийн бувну 12 зурул хьхьичIмурди. Гьашину мухIаррам зурул цалчинмур кьини хъанай дур июльданул 19-мур кьини.
Аль-Бухари ва Муслим имамтурал луттирдаву бур укунсса хIадис: «Шинаву буссар 12 барз, миннувасса 4 зуруву дяъви буван къабучIиссар, миннувагу 3 куннил хъирив кув най бу­ссар: зуль-Кьаада, зуль-ХIижжа, МухIаррам ва ялагу барачатсса Раджаб».
МухIаррам лавайсса хIур­матран лайкьсса барз бушиву бувсун бур мубараксса Кьурандалийгу, диндалул цайми луттирдайгу. «Диндалиясса элмурду утта дуккан даву» тIисса цала луттирай АбдухIамид МухIаммад ал-Гъазали чичлай ур, мухIаррам барз Аллагьнайн эбадатру дуллай бутарча, ва зурул барачат цайми зурдардийнгу биянтIиссар, тIий. Муслимлул бавтIсса Идавсил (с.аь.с.) хIадисирттавугу бур укунсса: «Рамазан зурул хъирив зума дургьуну яла хъинмур барз МухIаррамри».
Табранинал бувсъсса Идавсил (с.аь.с.) хIадис: «МухIаррам зуруй ца кьини зума дургьуманан чири бикIантIиссар зувира зума дургьуссаксса». Ва зуруй зума дургьуну хъин­ссар тIий бур хамис, нюжмар ва алхIаткьинирдай. МухIаррам зуруй дуссар хъинну бусравсса ацIилчинмур кьини – Аьшурдул кьини. Ва кьини зума дургьуну, садакьа бавчIуну, оьрчIру ххари бувну ва цаймигу хъиншивуртту дурну хъинссар, цурда кьинигу Кьуран ккалай гьан дурну хъинссар тIий бур аьлимтал.
Аллагьнал зун ва зул кулпатирттан паракьатшиву, хъиншиву, барачатшиву дулуннав, хъинбалардахсса чири чIяву буваннав, дунияллул ва ахиратрал балардаща буруччиннав!

Суаллу
ва жавабру

«Лаккуй ислам» («Ислам в Лакии») порталданий, Дагъусттаннал Муфтиятрал Ккуллал ва Лакрал районнайсса Просвещениялул отделданул хъунмур ПатIима Аьлие­вал хIадур дурну, суаллу ва жавабру дикIай лях-карах. Вай суаллугу, жавабругу, жулвами бу­ккултрангу дучIи лякъиншиврий дакI дарцIуну, кIицI лавгсса порталданийнгу барчаллагьрай, жулвамур кказитрайгу тикрал дуллай буру. Укунсса суаллансса жавабру кIулну хъиннихха, хайр бакъа, зарал къахьунссар.

Суал:
– Кулпат буван, магьар бишин хъинсса чIунну дикIайссарив?

Жаваб:
– Магьар бивхьуну хъинссар Сафар зуруй ва Шавваль зуруй. МухIаммад идавсил [саллаллагьу алейгьи ва саллям] Шавваль зуруй бувцуссар Аьишат [разияллагьу аьнгьа], Сафар зуруй цала душ ФатIимат [разияллагьу аьнгьа] щар буллуссар Аьли-асхIаблун [разияллагьу аьнгьу].
Мукунма магьар мизитраву бишаву хъинссар, имам ТIабранил бувсъсса хIадисраву увкусса куццуй. Ялагу, нюжмаркьини магьар биширча хъинссар тIий бур.
ЧIявусса салихIсса инсантал бусса кIанай кIюрххил (ахттайн бизаннин) магьар бивхьуну хъинссар увкунугу бур. Шинай­сса вайми зурдардийгу магьар бишин бучIиссар, личIишиву дакъассар.
Май зуруй ягу Зумарита­вал кьинилул ва Кьурбан-бай­рандалул дянив кулпат буван къабучIиссар учавугу тIайла бакъассар, мукунсса хавардайн вих хъанан къабучIиссар.
(«ТухIфатуль-мухIтаж», «Нигьаятуль-мухIтаж»).

Суал:
– Лас ивкIусса хъамитайпалул дягъу цими гьантлий дугьан аьркинссар?

Жаваб:
– Лас ивкIусса хъамитайпалул дягъу дугьан аьркинссар 4 зуруй ва 10 гьантлий. Ва ппурттуву хъамитайпалун чIюлу хъанан къабучIиссар – шаппа бикIу, кьатIув бикIу.
(«ТухIфатуль-мухIтаж»).

Ялун ххигу бан. Ххирасса буккулт! Агар зулвагу цIуххинсса бухьурча, суаллу тIайла буккияра вацапрай ва номерданий: 8-928-674-67-18.
Ва номерданийн суал гьан буваврияр ххишала цамур цикIуй чичлан къабучIиссар, так суал чичирча бакъасса. Аьлимтурал зул суалданухьхьун жаваб дулунтIиссар ва кказитрай рищунтIиссар.
ХIадур бувссар
ПатIимат Рамазановал