Ларгсса нюжмаркьини КIил­­чинмур ЦIувкIуллал шяраву хъуннасса шадлугъ дия, щалва жямат бувккун бия хушрай Украиннавусса аьралий иширттаву гьуртту хьун лавгсса, кутIасса отпускалий буттал шяравун ивсса, Рамазаннул арс Рамазанов Нураттин хьунаакьин. Ванал СВО-рай дачIи шин хьуну дур, Каспийскаллал флотилиялул хьхьирил пехоталущал кьутIигу цIакь дурну, лавгун ур Ватандалул мурадру буруччин. Къуллугъ буллай ур Запорожуллал чулий. Нураттиннул бувсунни игьалаган буллусса гьантри буттал шяраву, ичIувацириннал, шяраваллил агьулданул дянив гьан буван ччай ушиву.

«Жулва вирттал, кьянкьану бавцIуну, чувшиврий аьралий буржру биттур буллай бур, вай циняв хIакьсса арамталли, виртталли», – увкунни Ккуллал райондалул хъунама Шамил Рамазановлул, Нураттиннухь барчаллагь тIий.
Нураттиннулгу барчаллагь увкунни цува лахъа-хъун уван хьунин бувкцириннахьгу, хъин итан ххуйсса хъамалушинна дурну, хIадур хьуцириннахьгу.
Укунсса иширттавух гьуртту къавхьуну тинайну ацIан ччисса ушиву къакIулли царагу шяраву. Виричувнайн хъямала багьлай, иттав гьурххи хьусса ххаришиврул макь лихьлай бия ва кьини КIилчинмур ЦIувкIуллал хъами-душругу.
Я Аллагь, аьрая цIуллуну, сагъну ччяни шаппа-шаппай зана хьуннав жулва чиваркI! Цума-цагу аьраличувнан хъазамраву чIувин буван нясив буваннав цанма ххирами!