[dropcap]И[/dropcap]юньдалул 4-нний ЦIуссалакрал райондалий хьунни администрациялул бакIчинал бувчIавуртту. Райондалул администрациялул бакIчиталну бацIан ччиминнал 6 кандидатуралува яла чIявуми чIурду буллунни ХIамзатов МаматIи Бижаевичлухлу.
МаматIи ХIамзатов увну ур 1960 шинал ЦIуссалакрал райондалийсса ЦIуссалакрал шяраву. 1983 шинал ванал къуртал дурну дур СССР-данул КГБ-лул Москавуллал лавайсса погран-командный училищалул «Общевойсковой офицер с высшим образованием» тIисса пишакаршиву, 1990 шинал – магъриб мазурдил кIулшивуртту дусса каялувчитурал состав хIадур байсса «Офицер с высшим образованием» тIисса лавайсса курсру ва Аьрасатнал ФСБ-лул Академиялул «Юриспруденция».
МаматIи ХIамзатовлул захIматрал ххуллу байбивхьуну бур 1979 шинал. 2016 шинайннин къуллугъ буллай ивкIун ур Аьрасатнал ФСБ-лул органнаву. 2017 шиная зий ивкIун ур Ухссавнил Ккавкказуллал ФГКУ-рал Росгранстройрал директорну.
Лайкь хьуну ур паччахIлугърал ва ведомствалул чулухасса наградарттан: Чувшиврул ордендалун (1999 шиналсса иширттахлу), «За заслуги перед Отечеством II степени» ордендалул медальданун ва «За военные заслуги» ордендалун. Ва ур аьралий запасрал полковник.
МаматIи ХIамзатовлул бур кулпат ва шанма оьрчI.
Хъунмасса умуд бур МаматIи Бижаевич райондалул агьалинай дакI цIуцIисса, жяматрал мурадру буручлачисса, райондалул масъалартту кIулсса, жяматрачIан гъансса каялувчи хьунссар тIисса.
