[dropcap]И[/dropcap]юньдалул 4-нний Ккуллал райондалий Ваччав хьунни фольклорданул ва аслийсса культуралул «Наследие» цIанилусса фестиваль. Ва сакин дурну дия Республикалул Халкьуннал творчествалул къатлул, Ккуллал райондалул администрациялул ва Культуралул
ва бигьалагаврил центрданул.
[dropcap]В[/dropcap]ирттаврал аллеялий райондалул 14-гу фольклорданул коллективрал тIивтIуну бия халкьуннал багьу-бизу, аьдатру ккаккан дуллалисса майданну. Фестивальданул бусравсса хъамалну бия Комитаслул цIанийсса Ереваннал консерваториялул ансамбль «Голоса Армении». Ва дур Мери Карапетян каялувчисса студентътурал вокалданул ансамбль.
Райондалул бакIчи Шамил Рамазановлул, бусравсса хъамалгу, бавтIми цинявппагу дусшиврул ва фольклорданул байрандалущал барчагу бувну, баян бувна «Наследие» фестиваль дайдихьлахьишиву. Ванил дайдихьугу дурна райондалул шяраваллавасса фольклорданул коллективирттал.
[dropcap]Ф[/dropcap]естивальданул программа сакин хьуну дия кIива блокрая: «фольклорданул» ва «произвольный номердал». Цалчинмуниву райондалул цачIундур коллективрал ккаккан дурна хъатIул аьдат. Ва давривух гьурттуну бия «Бартукь» ва «Вихьлидуш» (мюрщи душвавралмургу) фольклорданул коллективругу.
Хъирив сахIналийн яргсса ва авадансса программалущал бувккуна «Голоса Армении» коллектив.
[dropcap]Ф[/dropcap]естивальданул программа гихуннай дачин дурна Республикалул «Пагьламан» цIанилусса школалул – 1-мур ЦIувкIуллал шяравасса пагьламантурал. Шикку, муданма кунма, бавтIми хIайран бувансса номер ккаккан бувна цIа дурксса Камил Маммаевлул.
Байран хьуна лавайсса даражалий, райондалул агьали ва ялун бувкIсса хъамал рязину личIансса куццуй.
