Ссут – яла буллугъмур, бакIлахъиялул аваданмур чIун. КIулсса куццуй, залуннан хъуснияр хъуслин заллу аьркинни. Ххяххан дурмур, аьрщарая дучIан дурмур ядаврилгу агьамшиву къачIирир. Ва иширавугу цаппарасса маслихIатру къабахчинссар тIиссару.
Калан
Калан ххуйну яхьунтIиссар дюхлулсса ва кьавкьсса кIанай. Хъиннува ххуйну яхьунтIиссар, агарда шартIру дуну, ца-цаних, кувннийн кув къащиланну, магъулун лахъарча. Калан бикIу, цайми ахънилсса дикIу ядуллалисса къатлувусса гьава чIун-чIумуй баххана буллан аьркинссар. Мукунма бавцIуну бикIан аьркинссар мивусса гьавалул ялув, му хъиннува бявкъусса ягу хъиннува хъавтсса къабикIан.
Хъахъи къур ва чIикIунтIа
ХьхьичIвагу увкусса куццуй, хъахъи къур холодильникраву ядурну хъинссар. Къур чIярусса дуни ва ми хъунмасса хIаллай ядуван аьркинни, бучIину лякъинтIиссар неххал къундалущалсса ящикIру. Вайннуву дихьлан хьхьичI цал къур цаппарасса хIаллай (20-30 минутIрай) диртун хъинссар марганцовкалул хьхьарасса раствордануву. Шива дурккун, ххуйну кьакьангу диртун, къундалул къат давай, къурул къат давай, ящикI буцIинцIа дихьлахьи. Къур кувннийн кув щилан къааьркинссар. Къурул ялтту бичлачисса къун я хъинну кьавкьсса, я хъинну хъавтсса бикIан къааьркинссар.
КIаланнуву, тIаннул ящикIирттаву дакъассагу, къур бучIиссар вара кьяйдалий балкондалий картондалул коробкарттаву ядувангу.
Къундалун кIанай бучIиссар ишла буван чимусул-лаччул ккири ягу опилкартту.
Агарда къур дарваграву духьурча, дарваграл барт чIуен бувну мабахIаванну, мивун гьава бухлансса куц битияра.
ЧIикIунтIа ва нувщи – хъинсса чIаххул
ЧIярусса хъатру циватура дуккан дуллалисса нувщи ва чIяру хъатру ххирасса ва ми цивунна ласайсса чIикIунтIа цачIу ядурну хъинссар, къат ванил, къат танил дуллай, ягу нувщи бивчусса ящикIрал ялувра-ялувсса къат чIикIунтIалул дурну. Укун, нувщува буклакисса пар (хъатру) цивунма ласлантIиссар чIикIунтIалул, ванийну вай кIирагу ахънилссаннун так мюнпатри хьунтIисса.
Нисварти
Цайми ахънилсса кунна, нисвартигу ччанссар дачалия, ахъува бавтIми – ва шинал махъра-махъсса бакIлахъия шайссаксса хъунмасса хIаллай ябувну.
Нисварти гъилишиврий ягу холодильникраву хъиннура дяркъу дуний, цивурасса хъатрулуцIа хъанай, меж бикIлай, ччяни зий хъанай бачайссар. Холодильникраву полиэтилендалул кьуцурттуву 10-нния ливчусса гьантрай ябуван хьунтIиссар нисварти, так кьуцурттул барт къалавкьуна бивтун, нисвартилул ялтту хъартсса марлигу дуртун.
Укунма кьуцурттуву, так гьарца нисварти цуппа-цуппалу чагъардануву кай-кай бувну, кьуцурттул бартгу бавхIуну, холодильникраву бачIи зуруйксса хIаллай яхьунтIиссар.
