ДакIнийхтуну барча уллай буру Ккуллал жяматрачIагу, цинявппагу гъан-маччаминначIа, дустурачIа, кIулначIа ххишала бакъа лавайсса хIурмат бусса, мяйжаннугу лакрал миллатгу, ниттил мазгу, буттахъал улчагу иширайну ххирасса, агьайкунсса зунтталчу, Мурачухъал ХIасаннул арс Рамазан.
Увну ур Рамазан Ккуллал шяраву 1955 шинал 21-мур майрай. ЧIярусса шиннардий зий ур «Кока-кола» компаниялул Дагъусттаннайсса филиалданул хъунаману.
Жун акъа чара бакъасса Рамазан! Барча вил 60 шин. Уттиния тихунайгу микссара шинну дансса каши дулуннав вихьхьун Аллагьу тааьланал.
Вил оьрмулул кьинирду дайшишру дакъа, инара дуллалимуницIун Залгу авкьуну гьаннав.
Ина оьрмулул уччиннин итаннав ичIуссанналгу, оьрчIал оьрчIалгу ххари уллай. Вил дугъришиврул, инсаншиврул бутIа лагмаминнайнгу бияннав.
Муданма виха дуаьлийсса вил ичIусса, махъсса гъан-маччами, дустал, уртакьтал, цинявппагу инагу, вил инсаншивугу кIулми
—————————————
ЧукIуннал шяравасса Шариплул арс Арабханов Муслим ниттил увну май зурул 22-нний там хьуссар 70 шин.
Муслимлул цалва оьрму бувтссар ва бутлайгу уссар цаламиннангу, чингу бусравну, зузисса даврийгу кьадрулий, кьиматрай ивкIссар мудан. НахIакьдан дакъар ванан дуллусса «Лахъсса даражалул хIакин», «Дагъусттан Республикалул лайкь хьусса хIакин», «ЗахIматрал ветеран» тIисса хьхьичIунсса цIарду.
Ванан ххишала бакъа ххирар цала Буттал кIану – ЧукIуннал шяравалу. Сайки гьарца байрандалий, отпускрай, игьалагай кьинирдай учIайссар цала бувгьусса багъгу бусса буттал къатрайн, цащала бувцуну учIайссар сайки щалва агьлу-авладгу.
ДакIнийхтуну барча дуллай буру жуна ххирасса инсаннал оьрмулуву кIицI ларгсса хъуннасса юбилей. ЧIа тIий буру ванан чIярусса цIуллусса шинну, цIу-цIусса ххаришивуртту, хъиншивуртту. Ина жун тачIаввагу чан къааннав!
Виха чIалачIин дакъасса вилцири циняв
————————————
Ниттил бувсса кьинилущал барча буллай буру ххирасса буттарссу, Дагъусттаннал лайкь хьусса учитель, ЧIятусса Сулайманова (Амирова) Магьият М.-Султаннул душ.
ЧIа тIий буру цIуллушиву, Занная хIалалсса цимигу хъинбала.
Ятинну ливчIуну,
Вингу, буттарссий,
КIулли къаккавкшиву
Ххарисса гьантта.
Мадутавкьай дакIнийн
Тти тай кьинирду,
КкурхIуссарча чIумул
Цикссагу дардру.
Биттур бувссар марцIну
Ина ниттил бурж,
Дурссар бутташиву
Вила кулпатран.
Тти оьрчIал оьрчIая
Чани ккакканнав,
Вин къабуллу мурад
Миннан булуннав.
Дуссар вил цIа жучIа
Мудан бюхттулну,
ОьрчIал оьрчIачIагу,
Вия ххарисса.
Вил уссил оьрчIру, душру, циняв ина ххираминнал цIанияту уссил душ Назира
