Майрал 6-нний Дагъусттаннал БакIчи Рамазан АьбдуллатIипов гьуртту хьунни шадлугърал тагьардануву Лувмур Чириюртлив Хъунмасса Буттал КIанттул цIанийсса дяъвилул ветерантуран «Ххувшаврил Парк» гьайкал тIитIаврий.
Гьайкал дурну дур инсантурал цалла арцух. Тикку дур мемориалданул ула, кIаний дур чирчуну Хъун дяъвилий гьуртту хьусса шяраваллил чиваркIуннал цIарду.
Гьайкал тIиртIуну махъ, Къизилюртуллал райондалул бакIчи МахIаммад Шабановлул шяраваллил жяматрахь барча увкунни ялун нанисса Ххувшаврил Кьини.
Рамазан АьбдуллатIиповлул, мемориалданучIа тIутIивгу дирхьуну, тиккура дузал дурсса даимансса цIу лархъунни.
«Жура тIитIлай буру гьайкаллу жулва Ххувшаву ларсъсса аьралитуран. Ттинияр тихуннайгу жура дачин данну му агьамсса даву, цанчирча жулла ватан дуруччайми жулва буттахъул ва ттаттахъул бивкIун тIий. Миннал цалла жанну хIайп къадурну бурувччуссар Совет Союз ва Дагъусттан. Жулла республикалия фронтрайн лавгссар 180 азара инсаннаяр ххишаласса, миннавату 90 азара ливчIссар дяъвилул майданнай. Гьарца кулпатраву, гьарца шяраву бакъассар къатта дяъвилийн чиваркI къалавгсса, жулла ватандалул тархъаншиврул цIаний. Жура жулла Ватан дуруччаврияр ххишала ххассал дурссар Европанал паччахIлугъру ва халкьру», — увкунни Дагъусттаннал БакIчинал.
Рамазан АьбдуллатIиповлул увкусса куццуй, цIанасса ппурттуву хъуннасса мяъна дуссар ялун нанисса ник ватан ххирашиврий тарбия даврил.
«Жува муданма захIматгу бихьлай, жулла Ватангу дуручлай бивкIсса халкьру», — увкунни Республикалул хъунаманал.
Ганая махъ ихтилатру бунни ДР-лул Халкьуннал Мажлисрал Председатель Хизри Шихсаидовлул, Лувмур Чириюртуллал шяравучу Излов Акашевлул ва цайминналгу.
