Хъуннасса уттарашинна дия апрель зурул 29-30-нний Лакрал райондалий ВацIилу зунттуй. ДР-лул МВД-лул сипталийнусса «По зову журавлей» акциялул лагрулуву Ххувшаврил 70 шин там шаврил юбилейран хасну шикку бувгьунни Дусшиврул парк.

Зулайхат Тахакьаева
ХьхьичI кьини, ккаккан дурсса ссятраву, ца шадлугърайн кунма, ххарину, низамрай бувккуна райондалул гьарцагу школалул дуклаки оьрчIру учительтурал ва директортурал каялувшиннаралу. Мурхьру бугьавриву гьуртту хьуна райондалул бакIдургьуми ва идарарттал каялувчитал. ВацIилу зунттуй бивщуна Рейхстаграй бивщусса Ххувшаврил Ттугълил копия.
Хъиривмур кьини Хъун дяъвилий жанну дуллуминнал аьпа абад буллалисса агьамсса ишираву гьур­тту хьун райондалийн бувкIунни ДР-лул МВД-лул министр Аьбдурашид МахIаммадов ва культуралул министр Зарема Буттаева.
Бусравсса хъамал хьунабакьин райондалул бакIдургьуми ва идарарттал каялувчитал бувккуна миллатрал виричу Хан-Муртазаьлил гьайкалданучIан. Микку хъамакъабитулун суратгу рирщуну, райондалул бакIчи Юсуп МахIаммадовлул ва кIиягу министрнал паркрал валтницIух бивщуна гьанна. Гичча бусравсса хъамал лавгуна Гъумуксса дяъвилия зана къавхьуминнансса гьайкалданучIа тIутIал шалкри бишин. Гиччагу ми лавгуна Аьрасатнал МВД-лул «Лакский» МО-лул хIаятраву дацIан дурсса къуллугърал буржру биттур буллай ливтIусса райондалул низам дуруччай органнал зузалтрал гьайкалданучIа тIутIал шалкри бишин.
Муния махъ цинявппа лавгуна ВацIилу зунттуйн. Шикку хъамаллурах ялугьлай бия «По зову журавлей» акциялул эмблемалущалсса футболкардавусса райондалул дуклаки оьрчIру ва Лакрал, Лаващиял, Ахъушиял, Гъуниннал, ЧIарадиял районнаясса виваллил иширттал зузалт.
Министртал бакъасса, шадлугърай ялагу гьуртту хьунни ДР-лул МВД-лул жяматийсса советрал хъунама, Аьрасатнал МВД-лул хъунмур управлениялул Жяматийсса советрал член, Аьрасатнал юстициялул министерствалул Правовая Академиялул Ухссавнил Ккавкказналмур филиалданул директор Багьауттин МахIаммадов, ДР-лул МВД-лул Жяматийсса советрал член, Аьрасатнал Журналистурал союзрал член, суратрищу ХIажимурад Зургалов, Гъуниннал хIаллил къаралданул каялувчи Исмяил Исмяилов.
Шадлугъ тIитIлай, ДР-лул МВД-лул министр Аьбдурашид МахIаммадовлул кIицI лавгуна «По зову журавлей» акция буллалишиву Ххувшаврил 70 шин там шаврин хасну, дяъвилул майданная зана къавхьуссагу, махъсса шиннардий билаятрайсса дакьаврил ва низамрал цIаний жанну дуллусса виваллил иширттал зузалтралгу аьпалун, дахьва оьрму бутлан байбихьлахьисса жагьилтурал жанну ссал цIаний дуллуссарив ялун нанисса никиран абадлий дакIний личIаншиврул ва цивппагу миннал эбратрай ватан ххирану тарбия хьуншиврул. КIицI лавгуна Лакрал район лув-ялув шамийлла лайкь хьушиву ПаччахIлугърал Обороналул комитетрал занази ЯтIул Ттугълин. Мунилгу тасттикь буллалиссар райондалул агьалинал ватандалухсса ччаву цуксса цIакьсса диркIссарив ва му ччаву цалва наслулун ирсирай кьадиртссар, увкуна ванал.
— Дяъвилия зана къавхьуминнал цалла жанну дуллуссар жула бучIантIимунил цIаний. Миннан цIа куссар Ххувшаврил 70 шинал юбилейран хасну бувгьусса мурхьру. ХIурмат бара вайннуха. Мунийну зу дяъвилий жанну дуллуминнал аьпа­лул хIурмат буллалиссару. Зунгу тачIав дяъвилул чIу къабаяваннав, — увкуна Зарема Буттаевал.
Юсуп МахIаммадовлул цалва ихтилатраву увкуна:
— Дахьва-дахьва жагьилшиврувун бухлахисса цимиягу азара инсан хушрай аьрайн лавгун, дяъвилул майданнайва ливчIун бур. Адаминал инсаннал оьрмулуву чара бакъа дан буржлувсса 3 агьамсса даврин хIисавсса дур къатта баву, мурхь бугьаву ва арс хъуна аву. Я арсру хъуни бан, я мурхьру бугьан, я къатри буван кьисмат къавхьуну дяъвилул цIараву ливчIсса жулла райондалиясса жагьилтурал аьпа­лул лишанну хьун аьркинссар хIакьину жува гьану бивзсса Дусшиврул парк. Жунма тачIав хъамабитан къааьркинссар тайннал аьпа буруччаврицIун тайннал оьттух дарцIусса дакьаву ва паракьатшиву дуруччавугу жулва яла къалагайсса бурж бушиву.
— ВацIилу хьуну бур «вацIа» тIисса мукъуя. ВацIа – му оьрмур. Яру мазрай тIурча «вацI» уссу тIиссар. ХIакьину жува ВацIилу зунттуй бугьарду вацIа. Бунияла уссушиврул ва дусшиврул вацIа хьуннав вания. Ххаришиврул­сса дакъа макь нясив къахьуннав ниттихъан,- увкуна ХIажимурад Зургаловлул.
Шадлугърай ихтилатру бувсса Аьрасатнал Правовая Академиялул Ухссавнил Ккавкказналмур филиалданул директор Багьауттин МахIаммадовлул ва Гъуниннал хIаллил къаралданул каялувчи Исмяил Исмяиловлулгу кIицI лавгуна ВацIилу зунттуй бувгьусса гьарцагу мурхь Ватандалухлу жанну дуллусса солдатнал бивкIу бакъашиврунсса лишанну хьунтIишиву.
Ихтилатирттая махъ акция лавайсса даражалий бан був­сса захIматрахлу Аьбдурашид МахIаммадовлул барчаллагьрал чагъарду буллуна Лакрал райондалул бакIчи Юсуп МахIаммадовлун, райондалул администрациялул бакIчинал хъиривчу Соня Макьаеван, КIулшиву дулаврил управлениялул каялувчи Явсупи ХIамзаевлун, Магьирлугърал управлениялул каялувчи Лида Кьурбанован.
Муния махъ хъамаллуращал дуклаки оьрчIру цIунилгу лавгуна лахьхьува къабувгьуну ливчIми мурхьру бугьан. Цалчин­сса мурхьру бувгьуна Аьбдурашид МахIаммадовлул, Зарема Буттаевал ва Юсуп МахIаммадовлул.
Гихуннай райондалул магьирлугърал зузалтрал ва Гъумучиял оьрчIал магьирлугърал школалул дуклаки оьрчIал ккаккан дуруна ххаллилсса концерт. Муний гьуртту хьуна республикалул «Ватандалухасса балайлул» конкурсрай ххув хьусса шагьрурдаясса ва цайми районнаясса дуклаки оьрчIругу.