Совет заманнай ялапар хъанай бивкIсса инсантуран тай чIунну ччя-ччяни дакIнийн дагьлан дикIай.
ХIакьину ттун пикри хьунни, уздансса лаккучу, Хъусращиял шяравасса Хъун-МахIаммадал арс, аьпа биву, СилахIуттин Кубачанов дакIнийн увтун, муная учин ца-кIива махъ.
СилахIуттиннущал на цалчин кIул хьуссияв 1982-ку шинал дайдихьулий Къизилюрт шагьрулий.
Му ппурттуву на уссияв Наримановлул цIанийсса СунбатIуллал колхозрал председательну зий. СилахIуттин ия Къизилюртуллал шяраваллил хозяйствалул техникалул базалул инженерну. КIилчин на ванащал хьунаавкьусса чIумал, ва ия Къизилюртуллал шяраваллил хозяйствалул техника, цаймигу кьай-кьуй даххайсса базалул директорну зий. Уздансса хасиятрал заллу бия мунал кулпат Раягу. Районная, щархъая бувкIсса инсантал, хъамал чIявуну миннанний гьантта бикIайва.
Таний колхозирттан, совхозирттан даххайсса техника итадакьайссия министерствалул дурсса нарядрайну, ягу хасъсса чекрал книжкарттайхчIин, ягу банкрая базалийн арцу дирчуну. Аьрщарай зузи дансса тракторду, хъарасру ва цаймигу ярагъ та чIумал хъинну лякъин захIматну бикIайва. Мукун, шяраваллил хозяйствалун аьркинсса ярагъуннил, кьай-кьуйлул хъирив багьну бикIайссияв жу. Министерствалул нарядрайхчIин хъинну захIматну машан ласайссия. Амма СилахIуттиннул жула райондалун техника итадакьинсса ххуллурду цалва лякъайва. Арцул лимит дакъанийгу, ванал, буржирай дуллуну, щаллу байва цачIанма бувкIсса лак.
Колхозран итабакьлакьисса кьай духхай машинартту хIукуматрал цал 3-4 зуруй бакIлахъия лакьлай зузи байва. СилахIуттиннуйхчIин ца машина ласунсса наряд дуллуна министерствалул. Саранскалия Газ-53 маркалул машина буцин гьан бувссия шофергу, механикгу. Вайннан тIайлабацIу къавхьуну, машина къабувцуну зана хьуну бувкIссар.
Ва иш кIул хьуну, СилахIуттиннул най бунува цахь циван къабусарду тIий, ца зурува цала базалия буллуна жун грузовик. СилахIуттиннул жул колхозрангу, цайми-цайминнунгу биялсса кумагру бувссар.
Мунал цалвагу учайва: «Ва оьрмулухунсса ттул буттал бутIурай бивсса къуллугъ бакъархха, нава шикку уссаксса, шаймур буллан аьркинссара», – куну.
Цибанссар, Заннал чичру духьунссия, ччяни аьпалул хьунни ххаллилсса лаккучу. Цан алжан булуннав!
МахIмуд Аьлилов,
ш. СунбатIул
