Лакрал райондалул бакIчи Юсуп МахIаммадов хьунаавкьунни Украиннал аьрщарайсса хасъсса аьрали спецоперациялий гьуртту хъанахъисса Заур Мяммаевлущал.

Хьурттал шяраватусса рядовой, Аьрасатнал аьрали гужирдал водитель Заур Мяммаев увкIун ур шавай игьалаган. Дяъви нанисса кIанттай ва ивкIун ур хасъсса аьрали операция байбивхьусса цалчинсса гьантрая шийнай.

Ванал бувсунни тийхсса иширттая, аьрали мурадру би­ттур буллалавриву хьунадакьлакьисса захIматшивурттая, жула аьралуннал тIайлабацIурттая.
Жард къакуну, дакI тIайлану Ватандалул цIаний буллали­сса къуллугърахлу, хасъсса аьра­ли операциялуву ккаккан дурсса чувшиврухлу Юсуп МахIаммадовлул Заур Мяммаевлун баян бунни щалагу райондалул жяматрал цIания барчаллагь.

– ДакIнийхтунусса барчаллагьрай буссару жу вийн вил къучагъшиврухлу, Ватандалул мурадру буруччаврил ххуллий бихьлахьисса захIматрахлу. Жу мудан хIадурнугу буссару зул чIарав бацIан, – увкунни Юсуп МахIаммадовлул.

Заурдул буттал Мямма Мяммаевлул барчаллагь увкунни арснах дурсса къулагъасрахлу. Аьрали операциялуву талатиминнан чIа увкунни ччясса мутталий цала буржгу биттур бувну, ужагъирттайн зана шаву.