ЦIуссалакрал райондалийсса ЦIуссалакрал шяравасса ХIажи Агъасиевлунгу чIавасса оьрмулий нясив хьуну бур дяъвилул оьсса сипат ккаккансса. Донбассрай хасъсса операциялия байбивхьусса цалчинсса гьантрая шийнай гьуртту хъанай ивкIун ур ва дяъвилул иширттаву. Вай гьантрай Агъасиевхъал кулпатрал ялун арс ХIажи отпускалий шавай итаавкьусса ххарисса хавар бивунни.

– Арснан уттигу махъунай дяъвилийн зана хьун аьркиншиву дакIнийн багьайхту, дакIнива ххаришиву дуккай», – тIий бур ХIажинал нину Светлана.
ХIажи увну ур 1993-ку шинал февраль зурул 14-нний. Дагъусттаннал паччахIлугърал университетрал граждан строительствалул ва промышленностьрал факультетгу къуртал бувну, лавгун ур аьралуннаву къуллугъ буллан. Аьрали къуллугърая махъ контракт чирчуну дур.
ЦIана ХIажинал къуртал хъанай дур кIилчинсса контракт. Аьрали къуллугъ бигьасса бакъанугу, ва хIадурну ур захIматшивуртту духIлан. Вай гьантрай ХIажи цIунилгу зана хъанай ур аьрали частьравун.
­