МахIачкъалалив Шахматирттал къатраву июнь­далул 23-нния июльданул 2-ннийн най дуссия жагьилтурал дянивсса Дагъусттаннал лагрулийсса шахматирттал первенство. Ваний гьурттушинна дунни сайки 200 инсаннал, ряхва категория хIисавравун лавсун. Хас дурну дия чемпионат Дунияллул шахматирттал ацIния кIийла чемпион Анатолий Карпов увсса кьинилун. Чемпионатрал сиптачитал хьунни ДР-лул Физкультуралул ва спортрал министерство ва Дагъусттаннал Шахматирттал федерация.

Пахру бансса иш бур ва Первенствалий гьуртту хьушиву жула лакку душ МахIаммадова Фатимагу. Классический шахматирттай 9 шинавун бияннинсса оьрмулул категориялулми гьурттучитураву Фатима був­ккунни хьхьичI ххуттайн. Ххувшаву ларсун, ва лайкь хьунни ДР-лул Физкультуралул ва спортрал министерствалул чулухасса 1-мур даражалул дипломран ва кубокран.

ЦIана ва хIадур хъанай бур Аьрасатнал лагрулийсса шахматирттал чемпионатрайн.
Бувну бур Фатима СунбатIу­ллал шяравасса МахIаммадов ХIусайннул ва Амуттинова Рукьижатлул кулпатраву. Ва бур лакрал миллатраву бусравсса Амуттиновхъал тухумраясса. Ялапар хъанай бур Каспийскалий. ЦIана Фатиман дур дурагу арулла шин. ДуклантIий бур Музыкалул ва хореографиялул 2-мур гимназия-интернатрай (ГИМХО). Ца пагьмулуву хьхьи­чIун ливчума, гьарцагу чулийнай итххявхсса икIайссар учай. Бур Фатимагу, шиннардих къабурувгун, оьрмулуву дуллалимуних – дуккаврих, музыкалух, художествалух, гъира-шавкь дусса. КIулли ванин оьнна чIун гьан къаритан.
ЧIавасса оьрмулий ва къа­чIирисса ххувшаву хIалал дурсса чIава чемпион барча буллай, чIа тIий буру оьрмулул ххуллий цIу-цIусса тIайлабацIуртту, хьхьичIуннайшивуртту!