Давудлул душ Адиллаева Ххадижат
Уттигъанну, оьрмулул 74 шинаву, захIматссса цIуцIаврища ххассал къавхьуну, ахиратрал хьунни ххаллилсса нину, захIматрал ветеран, ЧIятусса Давудлул душ Адиллаева Ххадижат.
ЧIявсса мяйра шинал школагу ххуйну къуртал бувну, ва шяравува бавцIуну бур къурнил давурттай, дояркану, советрай, шяраваллил хозяйствалуха зий. Кулпатраву мукьилчинсса оьрчI бунугу, ва шиччава най бунува аьдат хьуну бия захIмат ххирану. ЧIун дирукун, Адиллаев Рамазаннущал ташугу бувну, бувну бур ххуйсса кулпат.
Ххаллилсса тарбиягу дуллуну, лавайсса даражалул кIулшивурттугу дуллуну, вайннал лащу-щаллу бувну бур мукьа арс ва ца душ.
Оьрмулул 50 шин шайхту, пенсиялийн бувккун бур, ххюва оьрчI бувсса нину хIисаврай, лайкь хьуну бур, Нинушиврул 2-мур даражалул медальданунгу. ЗахIмат буллай аьдат хьусса Ххадижат, ялагу оьрчIал оьрчIалсса буллай, зий бакъацIайссия.
Ххадижат буссия дакI-аьмал хъинсса, ихтилат аьчухсса, гьарцаннащал хIал бавкьусса, ка-кумаг буван, чIарав бацIан хIадурсса, уздансса хъамитайпа.
Гьай-гьай, нинугу аьзизри, ниттил бивкIулул къювугу аьсивсса дикIай.
ЛичIантIиссар Ххадижатлул чаннасса, пишлищалсса симан мудангу оьрчIал, оьрчIал оьрчIал, цинявппагу кIулцириннал дакIурдиву.
Ххадижат аьпалул хьусса хъуннасса кьурчIишивугу кIидачIлай, жижара буллай буру ласнахь, арсурваврахь, душнихь, вайннал оьрчIахь, цинявппагу мачча-гъаннахь.
Цил гьав нурданул дуцIиннав, алжаннул ххари баннав, махънал оьрмурдай барачат бишиннав. Амин.
ЧIяйннал жямат
Кьурбаннул арс Къушиев Напик
Хар-хавар бакъасса азарданул 66 шинаву яла лавсунни чIявучин бусравсса чув (жяматрал ванайн Апу учайва), Кьурбаннул арс Къушиев Напик.
Увну ур Напик Хъурхъиял шяраву, 7 уссу ва 1 ссу бусса Забрижатлул ва Кьурбаннул кулпатраву. Хъуна хьуну ур МахIачкъалалив, къуртал бувну бур шагьрулул 34-мур школа.
Строительный техникумгу лавайсса кьиматирттай къуртал бувну, зун айивхьуну ур ЖБК-лий, тIаннул давуртту дувайсса цехрал хъунаману. Ва даврий зий Напиклул дурну дур сайки 30 шин. Шикку ва лайкь хьуну ур «ДакIнийхтунусса захIматрахлу» тIисса медальданун ва хIурматрал грамоталун, бур барчаллагьрал чагъардугу.
Замана баххана хъанай, инсантал дахху-ласулухун багьлагьисса 1994-ку шинал вагу машхул хьуну ия бизнесрахун.
Ванал дакI хъиншиву, хъамал ххирашиву кIулссар жяматрангу, лагма-ялттусса щархъал инсантурангу. Ва ия дакIнийхтунусса зунттал чув, ххирая буттал кIану, гъи гьан дайссия Лаккуй, гьуртту шайссия жяматрал давурттавух, чIарав ацIайссия гьарцанналгу.
Напик аьпалул шаврил кьурчIишивугу кIидачIлай, жижара буллай буру кулпатрахь Саниятлухь, арсваврахь Юсуплухь, Артурдухь, Маирбеклухь, щалагу агьлу-авладрахь.
Цал гьав нурданул дуцIиннав, алжаннул ххари аннав, махънал оьрмурдай барачат бишиннав.
***
Акъахьунна, лавгунна,
Ттуруллавун баргъ куна.
Жул дакIругу лирчIунни
Вия щакъалирххунна.
Щинах мякьнисса кунма
ЛивчIунни гъан-маччами,
Вил иминсса сипатгу
Пахъ дагьунни абадлий.
Вил чIу, вил яру, вил пиш,
Мюрщултраву чIаланссар,
Бусравсса буттал аьпа
Арсвавралгу ябанссар.
Хъурхъиял жямат,
дустал, гьалмахтал
Саэдлул арс ХIажиев Рамазан
КьурчIисса хавар бивунни Ккурккуллал жяматрал ялун. КIул бакъа балаллул оьрмулул аргъираву жуятува личIи унни шанма душнил ялун мурадиран увсса оьрчI, Кьадинахъал Саэдлул ва Рукьижатлул арс, ХIажиев Рамазан. Ванан дахьра 17 шинъя.
Школагу ххуйсса кьиматирттай къуртал бувну, ЕГЭ-гу дуллуну, Москавлив институтравун уххан хIадур хъанай уссия. Чичру цамур ляркъуну, къакьисмат хьунни. Чаннасса цIуку куна, яргну паргу куну, лавгунни Рамазан. Ва уссия, аьщун куна, нур дирзсса, гьунар бусса, оьрмулуха къалавхьхьуну аькьлу-кIулшилул увччусса, оьвхъусса.
Рамазан ххирассия шяраву хъунанангу, чIивинангу. Учительтуран, одноклассниктуран дакъая ванаха чIалачIин. Учительтурал урчIа ка хьуну, ванал хIарачатрай хIадур бувна выпускной балгу.
Хъамал ххирасса, бухху-букку чан бакъасса ХIажиевхъал кулпат райондалийгу хIурматрайсса кулпатри. Рамазангу цинявннал итталу хъуна хьусса, цинявннан ххирасса оьрчIъя.
ДакI-аьмал хъинсса ттул одноклассница Рукьижатлул ччя-ччяни чичайссия классрал группалувун: «Зу шагьрулий бизар къавхьурув, на зух ялугьлай бура», – куну. БавтIун жугу дачалийн, карчI къадурну, стол къур байссия. Ссав кунма, чаннану някIсса яругу пар-партIи бувну, жул хIурматру буллай, лагма уклай Рамазангу икIайссия.
ТачIав хъамакъаританссар чаннасса, иминсса пишлищалсса ванал симан.
– Ттул хIакиншиврул ци байссар, ина ххассал къаувсса, — тIий, ав-автIи дурну нинугу, буттал цIа дизансса арс увну, чIа тIи мурадрайн ивсса ппугу гъагъан увну, кьурчIисса макь рутIлатIи бувну ссурвалгу, щала агьлу-авладгу, лавгунни Рамазан.
Я Аллагь, цал гьав нурданул дуцIиннав. Нитти-буттахьхьун ссавур дулуннав. Ва духIан, лялиян дан захIматсса къюву цахъисрагу куклу дан, Рамазаннул цIа уттара дансса, ванаха лавхьхьусса арсру бувну душварал ххари баннав Саэд ва Рукьижат.
Махъсса цинявннал оьрмурдай барачат бишиннав.
Ккурккуллал жяматрал цIания
Андриана Аьбдуллаева
Жул аьзизсса Зулайхат!
Инавагу яргсса, лагмамигу чанна лахъан бувайсса! Лакрал театрданущал Къалмукьнавун махъсса гастроллайн бувкIсса чIумал пашманну бияв ина, вила уссил ва ссил арсру Украиннаву хасъсса аьрали операциялуву талай бушивугу буслай. Заннал буруччиннав тIий, умуд кьукьлай бакъассияв жугу, жува хьунабакьиннин дяъвигу къуртал хьуну, тайгу талатаврил майданная зана хьуну, вил чанипарсса пиш жунма цIунилгу ккаккантIишиврий. Къаччивахха ина дягъулуву ккаккан!
Диша вила дакIничIа жулссагу, къювулучIа къювугу.
Дулуннав Заннал зул кулпатрахьхьун захIматсса бивкIулул дард лялиян дансса каши!
Аликлул рухI рахIатний дишиннав, Алжан нясивну лякъиннав! Уссилми арсру цIуллуну зана хьусса ххаришиву зул кулпатрал ялун дияннав!
Къалмукьнал театрданул коллективрал цIания
Ирина Горяшкиева
