Мартрал 20-нний МахIачкъалалив Яру­ссаннал театрданул хьхьичIсса майданнив хьунни интнил республикалул XV байран «Навруз».

Бадрижамал Аьлиева
Байраннал сакиншинначитал бия ДР-лул Культуралул министерство, ДР-лул Культуралул министерствалучIасса Респуб­ликалул Халкьуннал творчествалул къатта, МахIачкъала шагьрулул Администрация ва Культуралул управление, ЮНЕСКО-лул иширтталсса буллали­сса Аьрасатнал Федерациялул Комиссиялул Дагъусттаннал отделениялучIасса материальный дакъасса культуралул ирсирал Комитет ва «Единая Ро­ссия» партиялул Дагъусттаннал отделение.
Ва байран хьунни «Человеческий капитал» приоритет проект иширайну щаллу даву мурадрай ва Дарбантуллан 2000 шин шаврин хасну дуллалисса аслийсса культуралул «Голос вечности» фестивальданул лагрулуву.
Байрандалувух гьуртту хьунни республикалул цимирагу райондалиясса ва шагьрурдаясса фольклорданул коллективру. Миннувух бия Лакрал ва ЦIуссалакрал райондалияссагу.
ЛачIлачIисса гъарах къабурувгун, байрандалийн бувкIун бия чIявусса халкь. КIира ссятраяр ххишаласса хIаллай сахIналийн, республикалул миллатирттал авадансса аьдатру, лаххия кка­ккан дуллай, буклай бия фольклорданул ансамбльлу: «Гъази-Гъумучи», «Самурские голоса», «Акаро», «Чахри», «Каякент», «Гергебиль», «Самоцветы», «Рыбачка», «Эрпели», «Авадан», «Волна», «Лукоморье» ва цаймигу. Гьарцагу коллектив тамашачитурал хьхьичIун буклай бия нахIу-нацIушивурттащалсса, миллатирттал дукрардащалсса ланжарттащал.
Байран къуртал хьунни къав­тIи бичаврийну.
Интнил байрандалувух гьур­тту хьусса цинявннан буллунни ДР-лул Культуралул министерствалул чулухасса дипломру.