Март зурул 18-нний ДР-лул Халкьуннал Мажлисрал цIуллу­шиву дуруччаврил ва социал политикалул комитетрал заседаниялий ххалбивгьунни мушакъатсса оьрчIал тагьардануцIун бавхIусса масъалартту.

П. Рамазанова
Комитетрал председатель Мурзадин Авезовлул бувсунни депутатътурачIан чIявусса нитти-буттахъул аьрзирдай букIлай бушиву, аькьлулул нукьсансса ва цIуллушиврул заэвсса оьрчIансса, ххуйсса реабилитациялул центр бакъашиврия рязий бакъа. Мунал бувсунни, махъсса шиннардий хIукуматрал мушакъатсса оьрчIах къулагъас дан хIарачат бухьурчагу, ттигу чулийн буккан бувасса масъалартту бушиву.
Мушакъатминнан кумаг буллалисса «Макь дакъасса оьрму» тIисса жяматийсса идаралул хъунмур Аьйшат ХIамзаевал бувсунни 2007 шиная шинмай зий бушиву Дауннул синдромращалсса, аутизм дусса ва ДЦП-лул къашавайсса оьрчIансса центр, так дяхттасса (Дом дневного пребывания), бувсунни микку зий бушиву мукунсса оьрчIащал зун лахьхьин бувсса педагогтал.
«ЖучIа мушакъатсса оьрчIру бусса нитти-буттахъан психологиялул кумаггу буллалиссар, хIакин-психиатрнал консультация дуллалиссар.
Педагогтал гьарцагу оьрчIа­щал зий буссар хасъсса программалийн бувну, амма учреждениялуща так 50 оьрчI акъа кьамул ан къашай, республикалул цайми шагьрурдаясса ва районнаясса оьрчIругу бур сияхIрай, аьмну сайки 35 азара оьрчI ур, мунияту чара бакъа мушакъатсса оьрчIансса центр буван аьркинни», — увкунни Аьйшат ХIамзаевал.
Депутатътал АхIмад Изиловлул ва ГъазимахIаммад Аьбдуллаевлулгу мукунсса центр буван багьлай бур тIисса мяъналийсса ихтилатру бунни.
Минздраврал министрнал хъиривчу Татьяна Ковтюхлул кIицI лавгунни республикалий Дауннул синдром ва аутизм дусса оьрчIащал зузисса идара бушиву так ца идара, Аьйшат ХIамзаевал «Жизнь без слез». Цамур учреждение дакъахьукун, мунил маслихIат бунни ялув кIицI лавгсса дяхттасса Къатлул гьанулий сакин буван ми азардал къашавайсса оьрчIансса центр.
Аьйшат ХIамзаевахь барчаллагь тIисса ихтилат бунни Кулпатрал, ниттихъал ва оьрчIал ихтиярду дуручлачисса Уполномоченный Интизар Мамутаевалгу. Аутизмалул къашавайсса арс усса ХIусман ХIусайновлул бувсунни цуку-цукунсса захIмат­шивуртту дуссарив мушакъатсса оьрчIру хъуни буллалисса кулпатирттаву. Бувсунни му оьрмулухунсса диагноз дусса оьрчIал реабилитация дуллалисса хасъсса учрежденияртту республикалий дакъашиврийн бувну, аутизмалул ва Дауннул синдромрал къашавайсса оьрчIал нитти-буттахъан гьар ишираву захIматну бушиву.
Депутатътурал махъ буллунни мукунсса центр бувавриха зун, хIукуматрал кумаг тIалав буван.