Февраль зурул 1-нний, Совет Союзрал кIийла Виричу, дунияллийх цIа ларгсса летчик-испытатель АхIмад-хан Султан увсса кьини, Къиримнаву, Алупкалий, Дагъусттаннал делегация хьунабавкьунни Виричунащал ца полкраву талай бивкIцириннащал, мунал гъан-маччацириннащал, даврил уртакьтуращал. МухIаммад Идавсил (с.аь.с.) карикатурарду кказит-журналлай рищаврийн къаршийсса автопробег дурну, чIявусса дагъусттанлувтал машинарттай лавгссия Къиримнавун, тайнналми бусурманнащал дусшиврул арарду цIакь дуван. Мийва гьантрай Дагъусттаннал вакилтал гьуртту хьуссия Севастополлай, Ялталий, Алупкалий хьусса личIи-личIисса мероприятиярдай.
П. Рамазанова
Алупкалийсса АхIмад-хан Султаннул цIанийсса музейраву Виричу дакIнийн утлатисса мероприятие хьуну дур, Виричунал дустал, генералтал, гъан-маччами ва дуклаки оьрчIру бавтIсса.
Микку ихтилатру бувну бур Дагъусттаннал делегациялувасса активистуралгу: Дагъусттаннал бакIчинал вакил Аьлибаг Аьлиевлул, МахIачкъалаллал Хъун мизитрал имам МахIаммад-расул Сааьдуевлул. Севастополлайсса дагъусттаннал вакил СалихIов Мурадлул музейран пишкаш бувну бур Дагъусттанная бусласисса личIи-личIисса луттирду.
Музейравусса батIаврия махъ, дуклаки оьрчIругу хIалану, тIутIив дишин цинявппагу лавгун бур Виричунал гьайкалданучIан.
«АхIмад-хан Султаннул гьайкал дихьлахьисса кIанттай на кIул хьура Виричунал ссурахъищал, му 84 шин хьусса инсан ия, цува дунияллия гьаннин АхIмад-хан буттал шяравун иян хияллай ия, — буслай ур Дагъусттаннал делегациялул вакил, жяматрал иширттавух чялишну хIала увхнувасса МахIаммад-Султан Аьлиев. — Къиримнал агьулданучIа АхIмад-хан Султаннул цIанил хIурмат бюхттулсса бия. Ххаллилсса музей бия. Виричунал цIанийсса школа бия. АхIмад-хан Султаннул ватанлувталли тIий жухагу гьаксса хIурматрай бия.
КIивагу миллатран, къиримнал татарнан ва лакран, мукунма дагъусттаннан, щалвагу Аьрасатнан ххира хьусса Виричунал 2 мусил цIуку лавсун бур: ца буттал ватандалун, ца ниттилмунин цIа кусса кунма».
