Совет Союзрал кIийла Виричу АхIмад-Хан Султан увну 95 шин шаврил хьунийн

Гьашину Совет Союзрал кIийла Виричу АхIмад-Хан Султан увну 95 шин бартлаглай дур. Му тарих лайкьсса даражалий хьунабакьаву мурад­рай, МахIачкъалалий бавтIун бия ЦIувкIуллал шяраваллил жяматрал вакилтал.

Даккаврил сакинчи ия шагьрурдайсса цIувкIуллал агьулданул диас­поралул бакIчи, Дагъусттаннал паччахIлугърал университетрал аьмсса физикалул кафедралул бакIчи, физика-математикалул элмурдал доктор МахIаммад-Баг Кьагьирович ХIусайнханов.
БатIавриву гьуртту хъанай бия Ккуллал райондалул администрациялул бакIчи Саэд ХIасниевич Сулаймановлул каялувшиврулусса мадарасса делегация – администрациялул бакIчинал хъиривчу Н. М. ХIажиева, администрациялул отделлал бакIчитал Н. М. ХIажиева, Ш. А. АхIмадов, Р. ХI. Рамазанов ва м.ц. Ми бакъассагу, даккаврий гьуртту хьуминнаву бия Дагъусттан Республикалул Жагьилтурал иширттал ва Культуралул минис­терстварттал вакилтал.
Даккаву тIиртIуна АхIмад-Хан Султаннуясса кинорайну. КIива миллат – лак ва къирим-татар цачIун буллалисса Виричу, Совет Союзрал кIийла Виричунаясса кино гьурттучитурал кьамул дурна хъатру ришлай.
Хъирив махъ лахълай, ХIусайн­хановлул бувсуна Совет Союзрал кIийла Виричу АхIмад-Хан Султан увну 95 шин шаврийннинсса давуртту дуллай дайдирхьуну душиву Къиримнаву, Бюхттулсса Виричу увсса улклуй. Дагъусттаннай му тарих лайкьсса даражалий хьунабакьаву мурадрай, Дагъусттан Республикалул Президентнал ва ХIукуматрал аьркинсса амрурду бувну бушиву ва бювхъусса хIарачат цIувкIуллал жяматралгу бан аьркиншиву.
Махъ лавхъуна Ккуллал райондалул администрациялул бакIчи Саэд ХIасниевич Сулаймановлул. Ганал бувсуна хъунмасса хIаллай личIисса ургъил къабуллай ивкIсса Бюхттулсса Виричу, Совет Союзрал кIийла Виричу АхIмад-Хан Султаннун цIанасса ппурттуву 6 гьайкал дацIан дурну душиву. Миннуву махъра-махъмур Ярославраймур дацIан дайни, цува цимилагу та Аьрасатнал шагьрулийн ивну ивкIшиву. «Утти кьаст дуссар Ккуллал райондалул центр Ва­ччав шяраваллил хъунмайдандалий гьайкал дацIан дан», – увкуна Сулаймановлул, ккаккан дурна гьайкалданул эскизругу. Бувсуна Аьрасатнава гранитгу бучIан буллай бушиву. «БучIан бан цукссагу кьювкьуну бацIлай бур, шиккува ласуннияр», – увкуна райондалул бакIчинал.
Даккаврий таманссаннал махъру лавхъуна. Миннувату чIалай бия СССР-данул бусрав­сса летчик-испытатель, Сталиннул премиялул лауреат, Совет Союзрал кIийла Виричу АхIмад-Хан Султан увну 95 шин шаврил ххарисса тарих лавай­сса даражалий бантIишиву, цанчирча даву мукун дан хьунтIишиврул хIучча – куннал чIарав кув бацIансса тадвир – цIитI бивкIун чIалачIисса бия.
С. Мусаев