Шагьрулул бакIчинал хъиривчу Абусупиян ХIасановлул, шагьрулул кIичIирттавух халкь ххилай автобусру та занантIиссар, тIисса суалданун жаваб дуллай, бувсуну буссия, ахиргу, халкь цанма-цанма аьркиннийн биян буллай занантIисса жяматрал транспорт – автобусру занантIишиву февральданул 1-нния тихунмай.
З. АьбдурахIманова
Февраль зурул дайдихьулийгу автобусру ххуллурдайн бувккун бакъар пассажиртал ххилантIисса 68 автобусрай зунтIисса водительтуран ттинин миннуй зун лахьхьин буллай бивкIун тIий.
Ттигу найнна дусса дур автобусру ГИБДД-лул учетрай бихьлахьисса цаппара, чагъардацIун дархIусса, мюрш давурттив. Вай давурттал жаваблувшиву дуллантIиссар тIар «Автоколонна 1736» ОАО-лул ва ДР-лул Транспортрал ва ххуллул хозяйствалул агентствалул.
Ца пассажирная ххуллул багьа ссан бацIлай бурив ххалбуллалисса давурттайн бувну, цIана мунил багьа бикIан тIий бусса бур 10 къуруш ва ххалбигьлай бусса бур МахIачкъалалия Каспийскалийнсса ххуллул багьагу.
Аьмну шагьрулувух занан ккаккан бувсса 30 автобусрал дяниву чIумул манзил бикIан тIий бусса бур 5-8 минутI, бигьалагай гьантрай тIурча занан тIий бусса бур 25 автобус. Вай автобусру занантIисса ххуллул манзилданий бусса бур 63 остановкардал пункт. Шагьрулул каялувшиннаралул вай остановкардал чIалачIин ххуй дуллантIисса давурттив дайдишин тIий дусса дур чIал къавхьуну.
«Махачкала – Аэропорт» линиялун ккаккан бувну бусса бур 3 автобус. Вай автобусру занантIиссар самолетру щядикIайсса, гьаз шайсса расписаниялул график хIисавравун лавсун.
