ХIакьину МахIачкъала шагьрулул хъуни кIичIирттавусса машиналул ххуллурду лавкьуну, халкь азурда буллалисса «пробкардал» масъала дузал бавриву ца яла къулаймур чаранну шагьрулул бакIчинан чIалай бур ми «пробкарду» шаврил сававсса хъуни базарду шагьрулул кьатIув, чунмай-бунугу ца зума-къирагърайн буккан баву.
Ва бакъасса, ми базаллавусса чIявуми даххултрал, ишбажаранчитурал ттучанну бусса бур маэшатрал, дахху-ласулул закон къадуручлачисса, шагьрулул чIалачIин зия дуллалисса.
З. АьбдурахIманова
Ларгмур шинал МахIаммад Сулаймановлул къулбасралу кьамул бувсса хIукмулийн бувну, пикри хьуну бур ва шинал «Муниципальный рынок» тIисса шагьрулийсса сайки циняв базарду бизан бувантIисса хъун базаллул майдан буллай байбишин. Ухссавнил Ккавкказнаву ца яла хъунмасса базаллун ккаллийсса проект хъанахъиссар ва.
ЦIана дайдирхьуссар ГАИ-лул Ухссавнил чулийсса пострая 5 км. архнийсса манзилданий М-29 «Кавказ» ххуллуцI базар буллай байбивхьусса давурттив.
Базар буллай байбишинсса кIану бакьин бан азарваксса машиналий аьрщи дирчуну, 150-ксса ттучандалун гьану бутIинсса кIану хIадур бувну бур цIанава.
Базаллул директор Мурад МахIаммадовлул бусаврийн бувну, базар бикIан тIий бусса бур 20 гектарданий. ЦIубакIрай бан тIий бусса бур 2000-ксса ттучан. Мукунма бан дакIний бусса бур 320 оьрчIансса детский сад, амбулатория, авторынок ва машинартту бацIансса парковкарду. Хъирив шагьрулия тIайланма базаллувун занантIисса автотранспортрал маршрутру тIитIин тIий бусса бур.
Ва базар тIитIаврищал 2015 шинал ахирданийннин хьхьичIва-хьхьичI бизан бан тIий бусса бур Ирчи-Къазахълул цIанийсса кIичIиравусса «Дагэлектромаш» -райсса хозяйствалул хъус дахлахисса базар.
ЦIусса базар бикIансса кIану цуппава бусса бур хъус ххилаххисса машинарттан къулайсса, шагьрулул кIичIирттаву ссятурдий «пробкардаву» чIун зия къахъанан хъуннасса дигьалагру дикIантIисса гьартасса майданнив. Мукунма ва базар тIитIаврийну гьарза хьун тIий бусса бур халкь зунсса кIанттурдугу.
