Гьарица шинах дуклаки оьрчIал дянив дайсса «Большая перемена» тIисса Щалагу Аьрасатнал конкурсрал финалданийн бувккунни ЦIуссалакрал райондалиясса дуклаки душ.
Арсанмирзал душ МахIаммадова Асият дуклай бур Гьамиящиял 2-мур школалий 10-мур классраву. Гьашину «Большая перемена» конкурсрай гьуртту хьунни ЦIуссалакрал райондалиясса 806 дуклаки оьрчI (5-10 классру).
Полуфиналданийн бувккунни Барчхойотардал школалий 8-мур классраву дуклакисса Мусаева Марина ва Гьамиящиял 2-мур школалиясса МахIаммадова Асият.
– Ларгсса шиналмуних бурувгун, цIанасса полуфиналданий шамлий ххишаласса задачартту бартбигьин багьлай бия. Гьай-гьай, ххишаласса чIунгу, гужгу харж бан аьркинну бия. Щаллусса нюжмардий жу зий буссияв. Ххал бигьлай буссияв экологиялул масъалартту, ляхъан буллай буссияв личIи-личIисса тIуркIурду, – буслай бур Асият.
Полуфиналданул хIасиллайн бувну, Асият МахIаммадова яла хьхьичIунминнал сияхIрайн лавхъунни. Утти ванин финалданийгу цила школалулгу, райондалулгу цIа дуруччин багьлай бур. ЧIа тIий буру жула лакку душнин ххувшаву.
Амина Юсупова
