Октябрьданул 24-нний МахIачкъалалив «АрхIал цIу-цIусса бюхттулшивурттачIан!» тIисса цIанилу хьунни оьрчIал ва чIава жагьилтурал творчествалул Цалчинсса инклюзивный фестиваль. Ва сакин дурну дия Дагъусттаннал паччахIлугърал Т. Мурадовлул цIанийсса филармониялул, ДР-лул Культуралул ва ЗахIматрал министерстварттал чIаравбацIаврийну, «Центр развития для детей с особенностями развития и инвалидов детства «Мирадж» АНО-ращал цачIуну.
Фестивальданий гьуртту хьунни цIуллу-сагъшиврул ссуссукьусса оьрчIансса республикалул центрдай ва школа-интернатирттай тарбия хъанахъисса, МахIачкъалалив, Дарбантлив, Буйнакскалив, Хасаврай ва УнцIукIуллал шяраву ялапар хъанахъисса оьрчIру. Вайннал ккаккан бувна цавувасса гьунарду: бувккуна шеърирду, увкуна балайрду, бивзуна къавтIун, ккаккан бувна личIи-личIисса театрал композицияртту. ЦIуллу-сагъшиврул ссуссукьусса оьрчIащал ца сахIналийн буклай бия филармониялул ва «Адемос» шоу-балетрал солистътал.
Фестивальданул лагрулий хьунни ляличIисса оьрчIал дирхьусса суратирттал ккаккиягу.
Фестивальданий гьуртту хьуну, сахIналий цалва гьунарду ккаккан баврийну оьрчIаву, опытрацIун, цIу-цIусса асардацIун, ххи хъанахъиссар цIу-цIусса хьхьичIуннайшивурттачIан, бюхттулшивурттачIан бачинсса гъира-гьавас, гуж.
Фестиваль хъанахъиссар жува ччянияцIава хияллай бивкIсса ххаллилсса муттану. Гьарца лавсъсса шаттирайну оьрчIаву цIакь хъанахъиссар цалва гужирдайнсса вихшала, ччимур дуван бюхъайссар, так хъинну ччан бикIарча тIисса пикри. Ттул оьрчIал, масалдаран, цанна ххирасса творчествалуцIун ва дучри ххяххан баврицIун, хIакьину цалва пишардал луртандалувун къавтIавурттугу ххи дунни. Ялуннин ваная къавтIала къахьурчангу, укунсса кIанттурдал ванавун цIусса ххувшавурттайнсса зуву дутлатиссар. ОьрчIал гьарцагу ша, ххувшаву хъинну захIматну дириллалисса нину-ппу ххари хьунсса кIанттурду хIакьину чIявусса бия, оьрчIал яруннивусса пар ккавккун, нитти-буттаву цIакь хьунни цалва ляличIисса оьрчIал бучIантIимур бушиврийнсса вихшала. Уттинин вих бакъа бивкIсса буттахъан, хIакьину оьрчIру сахIналий ккавккун, бувчIунни цуксса агьамшиву дуссарив уку-укунсса иширттал. На ххарира укун ххаллилсса даву МахIачкъалалив шаврия ва умуд бур ва гихуннайгу дулланссар тIисса, – тIий бур «Мирадж» Центрданул творчествалул программарттал каялувчи Элла ХIасанова.