Гьашину Волгоградрай хьусса «Шинал учитель» тIисса щалвагу Аьрасатнал конкурсрал гьурттучи, ГьунчIукьатIрал шяраватусса Къушиева Жанна Русланнул душ зий бур Каспийскалийсса Республикалул КIулшиврул центрданий ингилис мазрал дарсру дихьлай.

Билаятрал даражалийсса учительтурал дянив ца яла бусравсса ва конкурсрайнсса аьрххигу ванил хьуну бур цакунусса, нюжмардул мутталий хIадуршингу дурну, ссапарданийн бувксса.

Укунсса журалул конкурсирттавух чIявуну гьуртту шайсса ва миннуву цимилгу хьхьичIунсса кIанттурдан лайкь хьусса Жанна сивсуну ва дакI дарцIуну гьуртту хьуну бур билаятрал сайки циняр регионнаясса учительтал гьурттусса ва хъуннасса конкурсравух.

---

Му конкурсрайн Дагъусттаннал чулуха Жанна Къушиева тIайла бувккун бур республикалул даржалийсса конкурсрай ххув хьусса Лариса Шахбабаева къашавай шаву савав хьуну. Республикалул учительтурал дянивсса конкурсрай Жанна лайкь хьуну бивкIссар 2-мур кIанттун. Волгоградрайнсса хIадуршиннагу хьуну дур даврил уртакьталгу, къашавайсса Ларисагу гьурттуну, конкурсрайн бачин хьхьичIсса ца нюжмардул дянив хьхьу-кьини къаувкуну хIадур хъанай. Вания тIалавну бивкIун бур, щияркIуй махъун къабагьну, лайкьминнавух жулла республикагу ккаккан дан. Ва даву Жаннал шайсса куццуй бакIуйнгу дуккан дурну дур. Жюрилун хъинну дакI даркьуну дур ванил дирхьусса мастер-классрал дарсирай.

Бувну бур Жанна Пятигорскалий. Ванил ппу, Гьун­чIукьатIатусса Мигьруев Руслан Расуллул арс , фармацевтикалул элмурдал кандидат, зий усса ур Пятигорскаллал фармакологиялул институтраву. Буттан ччай бивкIун бур душнингу, цанма кунма, химиялул ва биологиялул элмурдах гъира буну. Жанна тIурча, школалиятува хияллай бивкIун бур чил мазурдихун машхул хьун.
2005 шинал Пятигорскаллал паччахIлугърал лингвистикалул университетрал ингилис ва немец мазрал факультет къуртал бувсса Жаннайн оьвкуну бур зун Москавлив, чил билаятрал фирмалий таржумачину зун.

Цаппара шиннардий тикку зийгу бивкIун, щар хьуну, Каспийскалийн бивзун махъ ванил цила оьрму бавхIуну бур школалуцIун. Учительнал захIматрал ххуллугу Жаннал байбивхьуну бур Каспийскаллал 6-мур школалий ингилис мазрал учительну зий. КIива оьрчIал нинугу хьуну, декретрал отпускалия махъмур захIматрал ххуллул дайдихьурив ванил хьуну дур цIанагу цуппа зузисса Республикалул КIулшиврул центрдания.

Ва Центрданий хъуннасса къулагъас дусса дур учительтурал кIулшивуртту гьарта-гьарза даврих ва, личIи-личIисса конкурсирттай гьуртту хъанай, кIулшивурттал даража хъиннува лахъ баврих. НахIакьдан бакъархха гьарца шинах Жанна Къушиевал дуклаки оьрчIру чIявуну ххув шайсса республикалул даражалийсса конкурсирттай ва олимпиадарттай. Ванил дарсирал метод дур оьрчIан къаччай буна зат лахьхьин бан къашай­ссар, гайннаву дарсирахсса гъира чантI учин бан учительнал буржри тIисса. Къаххирар ванин дарсирах гъира бакъасса оьрчIан лагьсса кьиматру бихьлай, гайннайн чIу лахъ буллалисса ва нигьачIакул буллалисса аьвзалзаманнул методгу. Ванил хIарачат бур оьрчIан кIулшивуртту так гайннан цаннар оьрмулуву аьркин хьунтIиссар тIий дарс дихьлан. Жанна Къушиевал дарсирдай щябивкIсса оьрчIан кIулссар цивппа ганичIа, кьиматрал цIаний бакъача, ххуйсса кIулшивурттал цIаний щябивкIун бушиву.

Хъуннасса дахIаву дур ванил оьрчIал нитти-буттащалгу. Цанчирча, ххуйсса кIулшивуртту ласун кьаст лархIусса чIумал, оьрчIал чIарах, цIакьсса чIира кунма, нину-ппугу бикIан аьркинссар.
– Нитти-буттал цала оьр­чIайнсса вихшалар гайннал оьрмулухунсса тIайлабацIугу, – тIий бур Жанна.

Цинма оьрмулухун ххира хьунсса пиша язи бувгьусса Жанна цаймигу хияллай бивкIун бур. Хъинну ччай бивкIун бур ванин, Европанал вирдакIсса Великобританиянал хъуншагьру Лондоннал кучардайх сайрданий бувккун, бусалдаравун дагьсса тайннал архитектуралий, къатрал хIаятирттай ва аякьалийн лавсъсса мюрщи ба­гъирдай тамаша бан. Ва хиялгу ванил щаллу хьуну бур пандемия сукку хьун хьхьичI.
Гихунмайгу ва къабигьа­сса, амма цинма ххирасса пишалий Жаннан тIайлабацIу ва хъуни-хъунисса ххуйшивуртту чIа учинну.