Дагъусттаннал БакIчи Сергей Меликовлул Аьрасатнал Виричу Зайнуттин Батмановлул кулпатран дуллунни Каспийскалийсса цIусса квартиралул кIулли.
2015 шинал майрай Кьасумкантуллал вацIрал ялув ацIайсса инспекторнал бувсса гьунарданул махIаттал бувну бивкIссар инсантал. Боевиктураща зевххуну бивкIссар оьрчIащалсса кулпат. Яла полициялул зузалт бандитътурахьхьун къабирияншиврул цува оьрмулуцIа хьуссар.
2018 шинал майрал 6-нний Аьрасатнал Президент Владимир Путиннул дуллуссар Зайнуттин Батмановлун Аьрасатнал Федерациялул Виричунал цIа (ивкIуну махъ). ЦIана ганал щащар Жамила Батмановал хъуни буллай бур 3 арс ва 1 душ. Га зий бур Къурагъиял райондалий цIимилул ссуну. Ванияр хьхьичI Сергей Меликовлул бувсуна вацIлул инспекторнал кулпатран кумаг бувну бивкIшиву, хIакьину Аьрасатнал Виричунал щащарнин ва оьрчIан кьисмат хьунни цIусса къатравун бизан.
