Гьар шинах кунма, гьашинугу Москавливсса Дагъусттаннал диаспора Ххувшаврил кьини Совет Союзрал кIийла Виричу АхIмад-Хан Султаннул ва цIа ларгсса спортсмен-парашютист Наби Аминтаевлул гьаврдай тIутIив дишин, вай дакIнийн бичин бавтIунни.
БавтIцириннавух бия Москавуллал «Дагъусттан» Культуралул центрданул, Дагъусттаннал Постпредствалул, Жяматийсса советрал, Мариян Илиясовал цIанийсса «Дараччи» фондрал филиалданул ва «Лакия» тIисса Лакрал жагьилтурал ккурандалул вакилтал. Культуралул центрданул каялувчи, профессор Арсен ХIусайновлул кIицI лавгунни Москавливсса лак бюхттулсса арсурваврал гьаврдайн батIаву ччянира цIакь хьусса аьдат душиву, АхIмад-Хан Султаннул ва Наби Аминтаевлул оьрмурду уттисса никиран чувшиврул ва бюхъу- гьунарданул дарсруну бушиву.
АхIмад-Хан Султаннул ва цинявппа фронтовиктурал аьпалул хIурмат лахъну ябуван жула бурж бушиврия бунни ихтилатру бавтIцириннал. Муданма кунма, тамансса цIувкIулгу бия бавтIцириннавух. ПатIимат Садикьовал бувсунни АхIмад-Хан Султан Дагъусттаннайн увкIсса чIумал му хIурматрай кьамул увцириннавух цила ппу Исяев Исягу ивкIшиву, хIакьинусса кьинигу аякьалий ядуллай бушиву ичIура Виричунал ва буттал цачIусса сурат.
Оьмар ГъазимахIаммадовлул бувсунни цала ттаттал, РСФСР-данул лайкь хьусса учитель Бакри Бакриевлул, чIявуну АхIмад-Хан Султаннул оьрмулия цахьвагу бусайсса бивкIшиву.
Полковник, Аьрасатнал лайкь хьусса аьрали лётчик Рамазан Рамазановлул бувсунни цува АхIмад-Хан Султаннул чувшиврул ва сисаврил хIайран увну лётчик хьун гьуз увкушиву.
Махъру лахълахъими, ца зумату кунма, АхIмад-Хан Султаннул ва Наби Аминтаевлул цIарду миллатрал цIа бюхттул дурминнал бакIххуттай душиврий чIурчIав дуллай бия. Хъин-хъинсса махъругу лавхъун, гьаврдай тIутIивгу дирхьуну мукьах рирщуна цачIусса суратругу хъамакъабитулун.
Арсен ХIусайновлул барчаллагь увкунни Новодевичье хIатталливсса Вирттаврал гьаврдай тIутIив дишин бувкIсса лакрал жагьилтурахь. «Жу жулва буржиран ккалли бувару жула бюхттулсса шяравучунал аьпалул хIурмат баву, оьрчIниява тарбиягу хьуссару АхIмад-Хан Султаннул оьрму эбратну», – увкунни Малик Халилбаговлул.
