Апрельданул 20-нний Сергей Меликов видео-конференциялул режимрай хьунаавкьунни Аьрасатнал ПрезидентначIасса оьрчIал ихтиярдал вакил Анна Кузнецоващал.

Хьунабакьавугу дайдирхьуна оьрчIансса социал ва медициналул идарартту ххал бувсса хIасиллая бусаврия ва республикалул шагьрурдай ва районнай ятинсса ва ургала акъа ливчIсса оьрчIал ихтиярду дуруччаву мурадрай дурсса давурттая.
Цалчинма-цалчин, ДР-лул БакIчинал Анна Кузнецовахь, Сириянава Аьрасатнавун жула оьрчIру зана буллалисса, му даврил ялувсса хъуннасса гьурттушиндарахлу барчаллагь баян бувна.
Ва даву щирикIин дурния шиннай, Сириянава, Иракьнава ва Туркнава Дагъусттаннайн бувцуну, уссур-ссуннайн тапшур бувну бур 173 оьрчI. Видеоконференция дан хьхьичIмур кьинигу Аьрасатнавун 44 оьрчI бувцуну бувкIун бур, миннава 41 оьрчI бусса бур дагъусттанлувтурал.
– Цумур-цагу цIакьсса обществалул гьанумур затну хъанахъиссар паччахIлугърал чулуха оьрчIру бурувччуну бушиврул ягу бакъашиврул кьанунну. Жула билаятрай хъуннасса аякьалий буссар оьрчIалми масъалартту. Хъуннасса къулагъас ва масъалалух дуссар билаятрал Президентнал кьамул бувсса хIукмурдавугу, – увкунни С.Меликовлул.
ЧIал къархьуну кIицI лаган­тIисса «Десятилетие детства» тIисса мероприятиярттал лагрулий республикалий сакин бувантIий бур оьрчIал ихтиярду цукун щаллу дуллай бурив ххал буллалисса пишакартурал группа.
Анна Кузнецовалгу бувсуна дяъвилул къизгъинсса ишру нанисса Сириянава, Иракьнава ва Туркнава ххассал бувсса оьрчIаву чIявуми Дагъусттаннаясса ляхълай бушиву ва кIицI бувна ми оьрчIал реабилитациялух республикалий агьамсса къулагъас дикIан аьркиншиву.
–Ттул пикрилий, Дагъус­ттаннай бюхъанссия, вайми регионнай ттигу бакъасса, дяъвилул цIарава ххассал був­сса оьрчIансса шартIругу дузал дурсса, идаралул гьану бизан. Укунсса журалул реабилитациялул майданну, ца Аьрасатнаву бакъасса, тIалавну бикIанссия цайми хIукуматирттал даражалийгу. ЦIана республикалий ва даву сукку дансса умудрай буру,– увкунни оьрчIал ихтиярдал вакилнал.
Жулла республика дусса дур жагьилтал чIявусса республика, агьалинал 28 % бусса бур жучIава оьрчIал. Анна Кузнецовал кIицI баврийну, му иш чIярусса регионнал хьурдай учинсса ишну хIисавну бусса бур ва укунсса «аваданшиву» дуру­ччин паччахIлугърал буржнугу хъанахъиссар.
ОьрчIал ихтиярдал вакилханалул пишакартурал хъуннасса даву дурсса шанна региондалувун багьну бур Дагъусттангу. Республикалул шагьрурдай ва районнай ххал бувну бур оьрчIансса 20 идара. ЦIа дансса иширан ккалли буллай бур ятинну ягу ургала акъа ливчIсса оьрчIал сияхI 18% чIири хьушиву. Социал журалул ятинтал чан хьуну бур 24,4 %. 2020 шинал жулла республикалий оьрчIал цIуллу-сагъшиврун нигьачIисса иш сававну ми нитти-буттаща зевхху­сса цуппа ца иш хьуну бакъар.
Хьунабакьаврий Анна Кузнецовал тавакъю бувна Сергей Меликовлухь цалла къулагъасрайн ласун республикалул школарттай оьрчIру гъили­сса дукралул ва оьрчIал цIуллу-сагъшиврунсса мероприятияр­ттал щаллу баврилмур тагьаргу.
Республикалул БакIчинал тавакъю бувна Анна Кузнецовахь паччахIлугърал даражалийсса къулагъасрайн ласун къачагътурал кьюкьравун лавгун, яла оьрмурдацIа хьусса ягу дуснакьирттаву щябивтсса нитти-буттал оьрчIахсса аякьагу.
КIицI бунни хаснува укунми оьрчIал тарбиялух хIукуматрал къулагъас дикIан багьлагьишиву ва цичIав тахсир бакъасса оьрчIал ихтиярду дурурччуну дикIан аьркиншиву.