Апрельданул 17-19-нний Дагъусттаннал БакIчи ивунни Дагъусттаннал Кьиблалул районнайн, ххал бивгьунни социал объектру, хьунаавкьунни кIанттул инсантуращал.
Дарбантуллал райондалий Къалаллал шяраву Сергей Меликовлул ххал бивгьунни 4 млн къурушрансса Модулданул ФАП. Яла увкIунни Мамедкъалаливсса Нариман Аьлиевлул цIанийсса совхозрайн. Ва дур хьхьичIунну зузисса къюмайтIутIул хозяйство, ванил дукIу ларсунни 20 азарда тонна къюмайтIутIул. Мура шяраву Республикалул каялувчи кIул хьунни цаппара социал объектирттащалгу.
Дагестанские Огнилий Сергей Меликовлул ххал диргьунни индустриал парк бансса аьрщи. ЦIана му ишла дуллай бакъар. Республикалул БакIчинал бувсунни му аьрщарай инвесторнал бартдигьинтIий душиву сокру, пюре ва нектарду дуккан дайсса проект.
Дагестанские Огнилий Республикалул каялувчинал ххал бивгьунни цIуну бувсса поликлиникагу, мунал бувсунни миккунсса аьркин-къарцин ласун кумаг бантIишиву. Мува шагьрулий кIул хьунни мукуна «Дагестан Стекло Тара» тIисса идаралущал. Микку Сергей Меликовлул дунни шагьрулул активращалсса батIавугу.
Табасараннал райондалий Дагъусттаннал БакIчинал ххал бивгьунни «Мамедкъала-Татиль-Хучни» ххуллул бакьин буллалисса бутIа. Яла ивунни «Арула уссил ва ца ссил къала» тIисса туристътурал объектрайн Ххучни шяраву. Микку ххал бивгьунни табасараннал бартбисуртту щащайсса куц. Микку зузисса ишбажаранчинал тавакъю бунни му пишалуха зузиминнан кумаг буван. Сергей Меликовлул бакIрайн лавсунни кумаг буван. Республикалул каялувчи кIул хьунни райондалул азарханалул давурттащал, ихтилат бунни кIанттул инсантуращал.
МахIарамкантуллал райондалий Оружбаллал шяраву Сергей Меликовлул ххал бивгьунни 304 оьрчIансса цIуну бувсса школа, цамур шяраву кIул хьунни цIуну бувсса оьрчIал багъращал. Яла Джепеллал шяраву ххал бивгьунни КФХ «Сад», му бур суперинтенсивсса журалул багъ, микку ишла дуллай дур кIунтIатIисса журалул щин дишаву.
Дагъусттаннал БакIчи увкIунни мукуна Докъузпариннал, Ахттиял, Агъуллал, Хивуллал ва Сулайман СтIаллал районнайн, ххал бивгьунни тиккусса социал идарартту, кIул хьунни захIматсса масъаларттащал, бакIрайн лавсунни кумаг буван ми дузал баву.
