Зунттал районнайн газ буцаврил давуртту сукку хьуссар

Манвел Мажонц

Итникьини республикалул СМИ-лул вакилтуращал хьунаавкьунни ДР-лул ХIукуматрал Председательнал хъиривчу Манвел Мажонц. Ванайн багьайссар жулла республикалул ттукIрал ва газрал масъалартту.

«Дагъусттаннал теплоэнергиялул комплексрал тагьар» тIисса цIанилусса пресс-конференция датIаврил мурадгу бия, ва яла ларгсса кIинттул сайки циняв шагьрурдай ва районнай халкь чани ва газ лешлай азурда хьуну тIий, ялун дучIантIисса ссутнил-кIинтнил чIумалнин гъалатIру бакьин баврин хасъсса къуллугъру зий байбивхьуну бушиву бусансса.
Бувсуна Манвел Мажонцлул зунттал районнайн газ буцаврил хIакъиравусса давурттугу цIулаган дуллай байбивхьуну бушиву. Арцу диял къахъанай дацIан дурну диркIсса давурттан гьашину республикалул районнайн газ буцин итабавкьуну бур 425, 4 миллион арцул. Вайра арцух бакьин бантIиссар газ бусса кIанттурдайсса 17 объектгу.
Вице-премьернал бусаврийну, гьашину газ буцлацисса давуртту сукку хьунтIий дур Агъуллал, Ккуллал, Лакрал, РутIуллал ва Шамиллул районнай.
– Республикалул инвестициярттал программалийн бувну, газ буциншиврул гьашинусса шинал газрал бургъурду бишинтIиссар 89 км манзилданийх, хIасил 12,5 азара инсан газрал щаллу хьунтIиссар. Республикалул халкь яхъанахъи­сса циняв кIанттурдайн газ бувцуну 100 процентрал къуртал хьунтIиссар 2030 шинайннин, – увкунни вице-премьернал.
Гьашину кIинттул чIявусса дагъусттанлувтал, хъунмурчIин МахIачкъалалив ва ванил лагма-ялттусса поселокирттай яхъанахъими, чани лешлай, авара баврил хIакъираву Манвел Мажонцлул бувсунни, цIана ттукIрал циняр объектирдал инвентаризация дурну, «Россети Северный Кавказ» ПАО-рал филиалданул каялувчитуращал цачIу зий бушиву. ТтукIрал тталлу, ххаллу цIудуккан даврил давуртту къуртал хьунтIиссар гьашину ссуттилнин.

Ва масъала дузал бансса мурадрай, “Россети” ПАО-рал хIадур дурну дур ххюра шинал мутталий республикалул ттукIрал щалла хозяйство цIу- дуккан дансса программа. Вай давурттангу итабакьин кка­ккан бувну бур 35 миллиард арцул. Масалдаран, гьашину дуллай сукку хьунтIисса давурттан цIанава итабавкьуну бур 1,7 миллиард арцул.
Февраль-мартрай хъунисса марххалтту бувну, республикалул цаппара районнай теплицарду буминнан хъунисса зараллу шаврил хIакъиравусса суалданухьхьун жаваб дуллай, вице-премьернал кIицI бунни жула цаппара ишбажаранчитуран теплицардавун къюкни газгу бувцуну цала маэшатраха зун ччай бушиву.
– Цумур-цагу райондалийн ягу шяравун газ буцайни, хIисавравун ласайссар гикку­сса агьалинал ккал, гикку ишла бансса газрал дуцин. Цакуну инсаннан цала аьрщарай теплица бан дакIнийн багьни, ишбажаранчишивруха зун дакIний ушиврия чункIуйгу баян къабувну, цала маэшатраха зун ивкIукун, га шяраву хIасул шай­ссар газ биял къахъанахъисса захIматшивуртту. Ва кIинттул ми ишру аварагу хьунни, – кунни Мажонцлул, аьщуйн щун бувну вай иширттал хIакъираву.
Ишла къабувсса газрах­сса хъунисса буржру укунма­сса инсантурай ялув бухIлай, дагъусттанлувтал газрал пишакартурал авара буллали­сса иширттал хIакъираву вице-премьернал кIицI лавгунни му масъала ХIукуматрал даражалийсса къулагъасрайн лавсун бушиву. Мукун авара буллай, бан-бит бакъа ливчIсса агьалинахь Мажонцлул маслихIат бунни ДР-лул Энергетикалул ва ЖКХ-лул министерствалийн цивппа къарязишиву баян буллалисса аьрзалущал бучIан ва цал пишакартурал, хъирив лавну, цуппа ца укунсса иш къулагъас дакъа къакьабитантIишиву.