Совещание дачин дурну ия премьер-министр Артём Здунов. Экономикалул министр ХIажи Султановлул бувсунни цIусса зузи кIантту буваврил бущи ххуйсса бушиврия, хIакьинусса кьининийн аьмну 20586 зузи кIану дузал бувшиву республикалий, ми, пландалух бурувгун, 59 процент хъанахъишиву.

Ванал маслихIат бунни, цавай минахуртал чIявусса буний (юристътал, экономистътал), цайми минахуртал (техника, строительствалул технология) къабиял хъанай бухьувкун, вузирттал ва техникумирттал студентътуращал ччя-ччяни хьунабакьаван. Роспотребнадзорданул Управлениялул хъунаманал къуллугъ чIумуйну бартбигьлагьисса Ирина Алжанбаговал бувсунни коронавирусрал захIматну къашавайми чан хъанахъисса тагьар душиву, муницIунма къашай хьуминнаву чIявуми мукьцIалла шинава ливчусса бушиву, цIухху- бусу буваврийну ялун ливчушиву чIявуми хъатIайн, ссукIурайн лавгния махъ къашай хьусса бушиву.

Бувсунни ванил садикирттайн заназисса мюрщи­сса оьрчIру вай гьантрай азарханардайн багьаврил ишираягу. ЦIуллушиву дуруччаврил министр­нал хъиривчу Татьяна Беляевал бувсунни, 9 оьрчI личIаннин, циняв оьрчIру азарханардая итабавкьушиву, ливчIминнал тагьаргу оьккисса дакъашиву. ДакIнийн бутанну, ларгсса нюжмардий 54 оьрчI, лякьлул инжитну, азарханардайн багьшиву. МахIачкъала шагьрулул хъунама Салман Дадаевлул бувсунни санитар тIалавшиннардацIун къабавкьуну зузисса предприятиярдай аькIри дихьлай бушиву, чIумуй бакIрай бавцIуну къазурча, ми лава- лакьингума бюхъайшиву.

П. Рамазанова