[dropcap]О[/dropcap]ктябрьданул 11-нний Дагъусттаннал паччахIлугърал филармониялул сахIналий хьунни дунияллул халкьуннал дянивсса Ухссавнил Ккавкказуллал КВН-лул юниор-лига. ЧIава хъярчъчитурал дянивсса бяст-ччал шамилчинни хъанахъисса. Вайннул сиптачину бур ДР-лул Жагьилтурал иширттал министерство.
Бадрижамал Аьлиева
[dropcap]Ю[/dropcap]ниор-лигалий гьуртту хьунни Ухссавнил Ккавкказуллал Федерал ва Кьиблалул Федерал округирттаясса 6 команда: «Чумачедчие» (Хасавраясса), «Не по-детски денеб» (МахIачкъалалиясса), «Юк Грозный» (Грозналиясса), «По берегу» (Волгоградраясса), «Сборная Владикавказа» (Владикавказраясса) ва «Моно Лево» (Екатеринбурграясса).
ЧIава жагьилтурал хъярчирдан кьиматру бишлашисса жюри сакин хьуну бия республикалий цIа ларгсса артистътурая ва блогертурая.
Хъярчирал фестиваль тIитIлатIисса шадлугърай гьуртту хьунни Дагъусттан Республикалул жагьилтурал министр Камил Саидов.
— Ва даву дахьра дайдихьлахьисса чIумал жун фестиваль укунсса лагрулийн лахъанссар тIисса пикривагу къашайва. ХIакьину жучIанма бувкIун бур жулва билаятрал регионнаясса хъамал. ЦIуну сакин хьусса командарттан чIа тIий ура хъуннамур КВН-лувугу щаллу шаву, КВН зун, анжагъ тIуркIуну къавхьуну, ца хъунмасса ишну шаву, — увкуна республикалул жагьилтурал бакIчинал.
Жюрилул дурсса хIасиллайну, цалчинсса кIану бувгьунни Екатеринбурграясса командалул, кIилчинмур – Владикавказраямунил, шамилчинмур – Грозналиясса командалул. Юниор-лигалул Гран-приран лайкь хьунни Волгоград шагьрулиясса команда.
