ТачIав паччахIтурая цичIав чивчусса инсан бакъара, ттулла даврийн багьаймур ба­къасса. Утти, Владимир Васильевлул Дагъусттаннал хъунаманал къуллугъ хушрай кьабивтун махъ, ххуллухъиндаран ца- кIира калима дуван бучIихьунссар тIий бура.

[dropcap]Ф[/dropcap]едерал центрданул жучIана гьан увсса «варягри-аьралийчури», гьарца чулуха бурмарду чIувин буллантIимари тIисса кIанттурду бунугу, чIалай бия найбунува Владимир Васильевлул даврил стиль-кьяйда гьужумрайсса, нигьа-чIакIул буллалисса къадикIантIишиву. «Силовик ухьурчагу, муная хъиншиврул, интеллигентшиврул нур нанишиву хIисав хъанан бикIайва. Виваллил культурагу, тактгу, занакьулушингу дия мунал.

На хъунамара, гьарзат кIулмара тIисса журалийсса бакъаяча ихтилат, маслихIатрайсса, укун буварча, къахъинав тIисса, дакI цIуцIаврийсса бия. Итххявхсса, гьунар бусса инсантуран аьлимтуран, студентътуран, дуклаки оьрчIан кьимат бишлашисса ия му, зузима гьаз уван, жулама, чилма личIи къауллан, ирсирай къуллугъру бачIаврин дазу дуллалисса ия. Дуван дакIнийцири давурттаву дан къабювхъуну лирчIссагу духьунссар, так дакI дарцIуну бура, дагъус­ттанчув акъанугу, мунан да­гъусттаннал агьлу ххира хьушиврий. ДакI дарцIуну бура лулттурасри ласаймигу, дулаймигу, цахъи бухьурчагу, чан хьушиврий, хъямалашиннардан ххуллу кьукьинсса чаранну чIяву хьушиврий, бюхъу-гьунар буми, лайкьми давурттай битлатисса хъиндайдихьу дуршиврий.Гьаннай­сса, бургъил тIиму къахьурча, тураннурагу диршиврий. Ва ялагу, Васильев хасну жула лакрангу барачатну авцIусса куна чIалан икIай. КъакIулли ттунна, ва махъзуманив кунма, хъуни-хъунисса къуллугъирттай лак бивкIсса цайми чIунну. Дагъусттаннал ца яла машгьурмур кказитрал хъунама редакторну зузисса ттул коллегал тIайланма учайва, «Дагъус­ттан­гу утти лакку шавай буну­ккар»,- куну. Ва националист зумувнусса тарап дугьаву дакъар, гьим ссайнни, чунни учирча, итххявхсса, гьунар бусса, аькьлу камилсса инсантуран багьайкунсса кьимат бищавриятусса рязийшиннар. ХIасил Васильевлул дурссар тIий бура агьалинал ва властьрал тарап гъан дуллалисса дайдихьугу. Хъунмасса умуд бур вай ххуй- ххуйсса давурттал бущи гихунмайгу сантирайсса ва лябу­кку бусса бикIантIишиврийн. Буну лякъиннав.

ПатIимат Рамазанова