Санкт-Петербурграй М. Горькийл цIанийсса Культуралул къатлуву уттигъанну хьуну дур Ххувшаву ларсун 69 шин шаврин хас дурну дуллалисса Ккавкказуллал халкьуннал культуралул IV фестиваль. Мунил сакиншинначитал бур Санкт-Петербурграйсса Миллатирттал дянивсса арардал ва миграциялул политика щаллу даврил комитет, Миллатирттал къатта ва НКО (национально-культурные объединения).

Бадрижамал Аьлиева
Муниннин хьхьичI цал фестивальданувух гьуртту хъанахъиминнал тIутIив дирхьуну дур Пискаревский мемориал хIатталличIа, Ленинградуллал блокадалуву ккашия, дякъия, бомбежкардая ливтIуминнал аьпа куну бур.
Фестиваль цурдагу дайдирхьуну дур дяъвилиясса сценкалийну. Миллатирттал къатлул директор Сергей Науменкол, фестиваль тIитIлай, увкуну бур:
— Ва шагьру буручлай Ккавкказуллал республикарттугу нигь, ццах дакъа талай диркIссар. Жун дакIний дуссар ми виричушивуртту ва ми чиваркIуннал хьхьичI бакIру кьус дитлай буру. Санкт-Петербурграй ялапар хъанай буссар ттуршунния ливчусса миллатирттал инсантал. Миннавасса гьарцаннал культура, мукунма Ккавкказнаваминналгу, хъанахъиссар Ухссавнил хъуншагьрулул культуралул буцан бан къашайсса бутIану. Жура бусраврай дуручлан аьркинссару жула дянивсса хъиншиврийсса арарду, кумаг буллан куннал куннан, му чIумалли жулва шагьрулийгу, щалва Аьрасатнавугу цимурца ххуйну дикIантIисса, — куну.
Сергей Науменкол, шагьрулул каялувшиннарал вакил Александр Асташкиннул губернатор Георгий Полтавченкол цIания ва цала цIания барча бувну бур ветерантал, блокадалуву бивкIми ва махъсса цинявппагу Ххувшаврил байрандалущал.
Санкт-Петербурграйсса ДР-лул вакил ХIасан ХIасановлул барчаллагь увкуну бур шагьрулул каялувшиннарахь, Миллатирттал къатлухь, НКО-рдахь, ва шагьрулий мукьилчин хъанахъисса фестивальданул сакиншинначитурахь, цилгу цимигу миллатрал халкь цачIун буллалисса, миллатирттал дянивсса дусшиву гьарта-гьарза ва цIакь дуллалисса, куннал культура куннан дурчIин, кIул хьун дуллалисса, куннал кунначIансса хIурмат лавай хьун буллалисса, уссушиврийсса ца миллат кунма ялапар хъанан кумаг буллалисса.
Муния махъ ва шадлугъравух гьуртту хьуну, хьхьичIун ливчуминнан бахшишру дуллуну дур. Фестивальданул хъунмур бахшишран лайкь хьуну дур Санкт-Петербурграйсса Ккавкказуллал миллатрал культуралул дагъусттаннал «Дружба» ансамбль. Мунил художествалул каялувчинугу ур Ашрафуттин Мехдиев. Ва ансамбльданул бахшишгу ванахьхьун дуллай, Ккавкказуллал культуралул центрданул каялувчи Ираклий Русиял кIицI лавгун бур «Дружба» ансамбль шагьрулуву дуллалисса гьарцагу мероприятиялувух хьхьичIунсса гьурттушинна дуллай душиву ва цилла магьиршивруву цикссагу бюхттулшивуртту лархъшиву ва коллективрал.
Ва ансамбльданун ва кьини ялагу дуллуну дур РКНК-лул (Российский конгресс народов Кавказа) чулухасса Грамота ва бахшиш, миллатирттал аьдатру дуручлачаврихлу ва ми хьхьичIуннай дуллалаврихлу.
Мукунма дипломирттан, бахшиширттан лайкь хьуну бур гуржиял, аьсатIиннал, армяннал, азирбижаннал ва цаймигу миллатирттал коллективру.
Ва кьини сахIналийн бувккун бур цимигу коллектив, къавтIаврил ва балай чаврил. «Дружба» ансамбльданул щаллу дурсса «Гергебиллал къавтIаву» тамашачитурал хъиннура ххуйну кьамул дурну дур.
Ва кьини М. Горькийл цIанийсса Культуралул къатлул сахIналий хьуну дур мяйжаннугусса дусшиврул фестиваль, культуралул фестиваль. Уку-укунсса батIавуртту дуллан, укун нахIуну, бавкьуну махъа нанисса ирс ялапар хъананшиврул бакъаяв туну жулва ттаттахъул талай бивкIсса, цимиягу къучагънал дяъвилул майданнай цалла жагьилсса жанну дуллусса.