Майрал 12-нний дунияллул чIявусса билаятирттай кIицI лагайссар Медициналул ссурваврал кьини. Ва кьинилул тарих байбихьлай бур 19-мур ттуршукулул дайдихьулий Къиримнал дяъвилул чIумал англичанка Флоренс Найтингейллул цуппа кунмасса хъанния сакин бувсса рахIму-цIимилул къуллугъ сакин бувния шинмай.

З. АьбдурахIманова
Флоренслул, Туркнаву цищала архIалсса цIимилул ссурвавращал дяъвилул майданнай бивщусса цила ватанлувтурал ва миннал союзниктурал щавурду дахIлай, ми хъин буллай, аякьа дуллалаву дакъассагу, сакин бувну бивкIссар саллатIнал яннарду шюшлан­сса прачечныйрду, аьралийтуран дукра-къяс дансса кухнярду. Мунилва сакин бувссар цIимилул ссурваврансса дунияллий цалчинсса школа тIитIинсса рахIму-цIимилул фондгу. Яла махъ хIукму хьуссар Флоренс Найтингейл ниттил бувсса кьини кIицI лаглан Медсестрахъал кьини.
ХIакьинусса кьини майрал 12-нний Халкьуннал дянивсса ЯтIул Ххачлил Комитетрал Флоренс Найтингейллул цIанийсса 50 медаль дулайссар вай лайкь дурсса медициналул зузалтран.
Ва кьинилун хасну МахIач­къалаллал № 1 азарханалий (Редукторный поселокрай) хьунни шикку зузисса медперсонал барча буллалисса батIаву ва вайннансса шадлугърал концерт. Концертравух гьурттушинна дунни Дагъус­ттаннал эстрадалул балайчи Ризван Оьмариевлул, «Голос Кавказа» хореографиялул ансамбльданул оьрчIал.
Азарханалул актовый залданувун бавтIсса цалва зузалт барчагу бувну, азарханалул хъунама хIакин Мажид Аьлиевлул кIицI лавгунни Аьрасатнаву Медсестрахъал кьини дувайшиву 1993 шиная шиннай ва жула хIукуматрал здравоохранениялул зузалтраву хъунмур бутIа медсестрахъал бугьлагьишиву.
— Барча буллай ура зу ва зул пишакаршивруву агьамсса кьинилущал.
ХIакиннал цаятува багьай­мур бувну, гихунай къашайшала ччаннай ацIаннин захIматнийгу, бигьанийгу ганал чIарав бавцIуми зу буру. Цумур-цагу медициналул идаралул даву медсестрахъал хъачIунттайри дарцIуну дусса. Операция бувну, къашайшала цайна цува укIлакIийни хьхьичIва-хьхьичI зул тIааьнсса ихтилатрал чантI учин уллай ур, зул пиш тIисса симаннай я бацIлай бур.
Халкьуннаву медикнал пиша яла бусравсса пиша бур. Му пишалул хъунмур хъар зуру ларсун нанимигу, — увкунни хъунама хIакиннал. Шадлугърал концерт­рал номердал ва ихтилатирттал дя-дяних азарханалий чIярусса шиннардий дакIмарцIну зузи­сса пишакартуран ХIурматрал грамотарду ва тIутIал кацIру пишкаш бувунни.
Шадлугърал сакиншинначишиву дурсса азарханалул пишакартурал мукунма ккаккан бунни цалла даврил лахIзарду ккаккан буллалисса хIазсса инсценировкагу.
Ва азархана тIивтIуния шинмай сайки зувираксса шиннардий операцияртту бувайсса блокраву хъунмур медсестрану зий бур ШавкIуллал шяравасса Багъдаева СултIанат Кьурбан­исмяиловна. Ва бур ДР-лул Здравоохранениялул отличиник.
Дагъусттаннал медучилищагу къуртал бувну, СултIанат цаппара хIаллай зий бивкIун бур Лак­рал райондалий. Цилла даврия СултIанат рязийнугу, ххаринугу буслай, кIицI лаглай бур Аллагьнал цихьхьун къашайшалал къюву чанссарагу лагь давансса, хьхьара дувансса каши дуллусса пиша бушиву.
— Ва бур ттул оьрчIнияцIава дакIнил язи бувгьусса пиша. ТакIуйвагу пашман хьуну бакъара захIматсса, хъуннасса жаваблувшиву тIалавсса даву дунугу. Щалва оьр­мулий къашайшалтраха аякьа дуллай бивкIра, утти ттунма кIулмур, ттула даврил опыт ялун нанисса, ттуйнма тапшур бувсса жагьилсса медсестрахъащал кIибачIлай бура. Барча буллай ттула уртакьтал ва кьинилущал, чIа тIий бура цIуллушиву ва тIайлабацIу.