Федерациялул Советрал Элмулул, КIулшиву дулаврил ва информациялул политикалул Комитетраву уттигъанну, яни февральданул 20-нний, хьуну бур «Вопросы сохранения и развития народного творчества в Российской Федерации» цIанилусса «ккуркки стол». Мунивух Дагъусттаннал чулуха гьуртту хьуссар ДР-лул культуралул министрнал хъиривчу, Республикалул Халкьуннал творчествалул Къатлул директор, АьФ-лул ПрезидентначIасса Культуралул ва искусствалул советрал член МухIадова Марита.

«Ккуркки стол» хьуну бур му Комитетрал председательнал цалчинма хъиривчу Виктор Лопатниковлул каялувшиннаралу. Ва батIавривух ялагу гьуртту хьуну бур Аьрасатнал Федерациялул Культуралул министерствалул вакилтал, жулва билаятрал искусствалуву цIарду машгьурсса артистал, композитортал, музыкантътал, Аьра­сатнал ПаччахIлугърал Халкьуннал творчествалул Къатлул директор, мукунма Белгородуллал, Ростовуллал, Калугалул, Оренбургуллал, Новосибирскаллал, Ханты-Мансийскаллал округрал ва Аьрасатнал цаймигу регионнал халкьуннал творчествалул центр­дал каялувчитал.
Му батIаврий Марита Велихановнал бувну бур доклад, цивугу Дагъусттан Республикалий халкьуннал искусство ва му хьхьичIуннай нанаву ци тагьарданий дуссарив бусласисса.
Заседаниялий, мукунма, док­ладру бувну бур АьФ-лул Культуралул министерствалул туризмалул ва регионал политикалул Департаментрал директор Ольга Яриловал, Алтайллал Республикалул культуралул министр Владимир Кончевлул, Москавуллал областьрал культуралул министрнал хъиривчу Светлана Горушкинал, «Русс­кая песня» театрданул каялувчи Надежда Бабкинал, Аьрасатнал Федерациялул ЦачIунхьу гужирдал военно-оркестровый службалул начальник, хъунама аьрали дирижер Валерий Халиловлул ва чIявусса цайминналгу.
БатIавривух гьуртту хьуну бур Комитетрал члентал Галина Николаева, Сергей Щеблыгин, Федерациялул Советрал социал политикалул Комитетрал член Татьяна Заболотная.
Ихтилат буллалими чIурчIав дуллай бивкIун бур халкьуннал творчество Аьрасатнал художествалул культуралул ца яла куртIмур ва агьаммур къат хъанай душиврий, му никирттал ва эпохарттал дахIаву цIакь дуллалисса, миллатрал кIулшилул гьануну хъанахъишиврий, му аралувусса творчествалул давугу щаллу хъанай душиврий регионнал центрдал ва халкьуннал творчествардал къатрал ляличIийсса системалийну, дахIаврийну. КIицI лавгун бур махъсса шиннардий халкьуннал творчество ва миллатирттал аслийсса культурарду дуруччаврил, хьхьичIуннай даврил ва машгьур даврил аралуву итталун дагьансса хъин чулиннайсса дахханашивуртту хьушиву, халкьуннал дянивсса, щалагу Аьрасатнал ва регионнал дянивсса фестиваллал, фольклорданул ва халкьуннал творчествалул байраннал чIаравбацIаву, ка-кумаг хъун хьушиву ва мунилгу душиву хъуннасса агьамшиву, Культуралул шинал дувансса, цайнугу халкьуннал творчествалул ва аслийсса культуралул чIаравбацIаву дуллалисса, давурттал, шадлугъирттал плангу Аьрасатнал ХIукуматрал сакин дуршиву.
Амма, Аьрасатнал Федерациялул халкьуннал творчество дуруччавриву ва ларай давриву хьусса хьхьичIуннайшивурттах къабурувгун, ца яла цIюрювкьюмур масъалану личIлай бур жулла билаятрал законодательствалуву цин лайкьсса нормативно-правовой база ва «нематериальное культурное наследие» калима дакъашиву. Уттинин сакин дурну дакъар ведомствалул дянивсса халкьуннал аслийсса касмурду ядаврил ва хьхьичIуннай даврил ялув дацIансса орган, ххалдиргьуну ва сакин дурну дакъар ми касмурду хьхьичIуннай даврил стратегия. Гьаз бувну бур регионнал ГТРК-рдай ва радиоканаллай халкьуннал творчество машгьур дуллансса передачартту сакин дуван аьркиншиврулмур суалгу. Вай, ва чIявусса цаймигу масъаларттайн багьайсса ихтилатру хьуну бур ва батIаврий.
Заседаниялул хIасиллайн бувну сакин дурну дур Аьрасатнал Федерациялул ХIукуматрайнсса, Аьрасатнал Федерациялул Федерал Мажлисрайнсса, Аьрасатнал Федерациялул Культуралул, Промышленностьрал ва машлул министерствардайнсса, ВГТРК-лийнсса, субъектирдал паччахIлугърал ва кIанттул цилакаялувшиннарал органнайнсса рекомендациярду.