[dropcap]Я[/dropcap]нварьданул 10-нний журналистътуращал хьунаавкьунни Дагъусттаннай усса увагу ца FMX-райдер (мотофристайлер) ХIажимурад АхIмадов.
Пресс-конференциялий мунал бувсунни гьашину буван най ушиву цаппара трюкру: Эльбрус-Зунттуйн мотоциклетрай лахъан, анаварсса бущилий; ххуллийх нанисса поездрал ялтту тIанкI дуван ва Сулакьрал каньондалуву парашютрай тIанкI учин.
ХI. Аьдилов
ХIажимурадлул тIимунийну, мукунсса увинтру Аьрасатнаву ттинин щилчIав къадурну дур. Подмосковьелий бусса бур тренировкартту дайсса лагерь, тикку хIадур хъанай бусса бур Аьрасатнал мотофристайлертал. ХIажимурадлул ният дур республикалул жагьилтуран мотофристайл лахьхьин дуллан.
— Мотоэндро жучIара чан-кьансса дунугу дур, амма мотокросс ва мотофристайл духларгун дур СССР пасат хьуну, ДОСААФ-ру лавкьуну махъ. ЖучIава бур сивсусса, къучагъсса жагьилтал, хъинну хьунссия, му журалул спорт лядуккан дулларча жучIарагу. ЦIана жу жулва блогру ингилис мазрайн буцлай буру.
Москавливсса профессионал райдертурал буслай бур ттуяту гъалгъа тIий бушиву щалва Европа. Инсантал вихну бакъар на Сулакьрал къуманиву тIанкI дуван най ушиврий», — увкунни мотофристайлернал.
ХI. АхIмадовлул бувсунни цува цукун хIадур хъанай уссарив ми захIматсса трюкру буван. Мотокроссрайн хIадур хъанай ур Таркилий, хасъсса ххуллийх ссур дуллай. Яла, хъиривмур кьини, спортзалдануву хIадур хъанай ур. Интту хIадур хъанантIий ур, парашютрай тIанкIру дуллай. Ца кьини мяйлла тIанкI дуван аьркинссар. Яла дулунтIиссар мунан дунияллул халкьуннал дянивсса сертификат. Мотоциклетрай цIакь дувантIий ур парашютрал система.
