[dropcap]Я[/dropcap]ргсса ва дакIний личIансса ЦIушинал мажлис хIадур бай гьарца шинах жула театрданул. Тамашачитурангу концертру ххирашиву хIисаврайн ларсун,

вава мажлис тикрал бай духмур ЦIушинал хьунийнгу. Ттун ттунна циван ххирар чирча Лакрал театрданул концертру, хъунмур къулагъас халкьуннал балайрдах дикIавай тIий.

---

Зулайхат Тахакьаева
[dropcap]М[/dropcap]якь къалиххай, цала аккор­деонгу бивщуну, ХIажиаьли ХIажиаьлиевлул тIутIисса балайрдая, мукунма, цала аккордеонгу бивщуну, цала чирчусса макьандалий Аслан Шагьмардановлул щаллу байсса балайрдаягу.

Лях-карах хъярч-махсарар­ттугу хIала бичлай, тамашачитуран тIааьнну концерт дачин дурну бия Саният Рамазанова ва Шамсуттин Къапланов.
Саният ХIажиевал чивчусса хъярчилсса хавар бувсун, вичIи дирхьуми биялну бялахъан бувна ПатIимат Давыдовал.

[dropcap]Б[/dropcap]алайрду ялагу увкуна Саният Рамазановал, Луиза Шагьдиловал, Юлиана МахIаммадовал, Ямлихан ХIажиевлул, Хидирнаби МахIаммадовлул, Шамсуттин Къаплановлул, Рамил КьурбанмахIаммадовлул, Аьбдул Мурадовлул, Руслан Агъаровлул, Жаннат Гянжиевал.

Концертрал яргшиву лапра ххи дуруна театрданучIасса балет­рал къавтIалтрал. Вайннал щаллу дуруна Муса Оздоевлул сакин дурсса цыганнал ва латинамериканал къавтIавуртту. Цала проектирдай гьурттушинна дан театрданул каялувчитурал даингу оьвчай миллатрал цIанихсса балайчитурайнгу. Ва базилух оьвкуну бия Загьидат Муслимовайн ва Жанна Кьурбановайн.

Тамашачитуран ца яла хъуннасса ххаришивуну хьуна лак­рал миллатрал язисса балайчинан ккаллину ивкIсса, чIун дакъа жуятува лавгсса, Жамал Абакаровлул арс Абакар Абакаров сахIналийн уккаву. Дахьра цIа баяйхтугу, балай учайхтугу, кьакъабагьавай хъатру ришлай бия тамашачитал. Абакар цува тIурча, лахьлай ия жагьилний­сса Жамаллуха.
ДайлиртIуна концерт лакрал миллатрал аслисса «Къиссу» къавтIаврийну.
Концертрал программалул режиссерну ия Дагъусттаннал Халкьуннал артист Аслан МахIаммадов.