Декабрьданул 23-нний Дагъусттаннал БакIчи Владимир Васильевлул хьхьичIунну зузисса дагъусттанлувтуран дуллунни Аьрасатнал Федерациялул ва Дагъусттаннал Республикалул паччахIлугърал наградартту.
Наградартту дулун хьхьичI бавтIминнайн лаивзунни Дагъусттаннал БакIчи: «ЦIусса шинал хьхьичI мудан жура дувару лаглагисса шинал хIасиллу. Жунна чIалай дур хъин чулийсса дахханашивуртту хъанай душиву, амма чIярур уттигу дан-дитанмур. ХIакьину ттун тIааьнну бур паччахIлугърал наградартту дулун жулла республика хьхьичIуннай давриву бивхьусса захIматрахлу.
Аьрасатнал Президент Владимир Путиннул къулбас дурунни Дагъусттаннал муфтий АхIмад Аьбдуллаевлун ва Ягьудинал общинарттал советрал председатель Валерий Дебияевлун Дусшиврул орденну дулаврил хIакъиравусса хIукмулий», — увкунни Дагъусттаннал БакIчинал.
ЗахIматраву хьхьичIуннайшивуртту хьун даврихлу ва чIярусса шиннардий лажин кIялану зузаврихлу «Ватандалул хьхьичI лайкь шаврихлу» тIисса II даражалул ордендалул медаль дуллунни Дагъусттаннал военозирован кьюкьлул командир Мирза ХIасановлун. «Дагъусттан Республикалул хьхьичI лайкь шаврихлу» тIисса орден дуллунни художник-скульптор МахIаммад-Аьли Аьлиевлун ва ДГПУ-рал профессор МахIаммад ХIасановлун.
АцIния кIива оьрчI-бакI лайкьсса тарбиялий хъуни баврихлу «Ниттил орден» дуллунни Аминат Элмурзаеван. «ДР-лий физкультуралул ва спортрал аралуву лайкь шаврихлу» тIисса медаллу дуллунни олимпий чемпион МахIаммад-ХIасан Абушевлун ва боксрал дунияллул чемпионка Земфира МахIаммадаьлиеван.
Барчаллагьрал чагъарду буллунни Дагъусттаннал национал проектирдал координатортал Рукьият АхIмадован, Анна Безрукован ва МухIаммад Рашидовлун.
