Ояма каратэ школалул хьхьичIуннайшивуртту

[dropcap]Н[/dropcap]оябрьданул байбихьулий Минеральные воды шагьрулий хьунни Ухссавнил Ккавкказуллал федерал округрал цинярда кьяйдарду ишла дурну (всестилевое каратэ) бияйсса каратэлул чемпионат.

ХI. Аьдилов
Дагъусттаннал цачIундур командалувух гьуртту хьуссар Ояма-каратэ школалул спортсментал. Му школалул тренернугу, каялувчинугу зий ур Хизри РахIимов. Мунал дур «лухIимур мухIлу», 2-мур дан. Му хъанахъиссар Ояма каратэлул дунияллул сакиншиндарал Дагъусттаннайсса вакил. Контакт-каратэлул Дагъусттаннал цачIундур командалул каялувчитал бур Хизри РахIимов ва Арсен ХIаммадов (кIиягу лак­ри). Хизрил тIимунийну, чемпионатрай гьуртту хьуну ур 6 спортсмен.

Камил Давдиевлущал

[dropcap]М[/dropcap]иннавату цалчинмур кIану бувгьуну бур Мазаев Исламлул (55 кило), вагу лаккуоьрчIри. Ва ивну ур 4 муттаэнащал, цинявннаяр ххув хьуну ур. КIилчинми кIанттурду бувгьуну бур Аьбдулкьасумов ХIабиблул ва Аьбдулкьасумов ХIабиблул. Шамилчинми кIанттурду бувгьуну бур Халимбеков Халимбеклул ва ЯрахIмадов Алауттиннул.
Декабрьданул 15-нний хьуну дур МахIачкъала шагьрулул лагрулийсса кекусинкай каратэлул чемпионат. Муний Ислам Мазаевлул бувгьуну бур 2-мур кIану. ХьхьичIунсса кIанттурду бувгьуну бур цайминналгу.

Школалийн занай бур 40-50 шин хьусса чиваркIгу.
Нагу лавгра му школалийн ца ахттакьун кьини, Хизрил оьвкуну. Тренертурал къатлуву бия бакIру кIяла хьусса 4-5 адимина. Яла залданувун увкIунни ца агьилсса адиминагу, мунан дия 70-ллихъайсса шинну! Мунал арсругу бия каратэ лахьлай.
Интту, гъинттул спортсментал лагайсса бур вардиш хъанан хьхьирийн.

Мива зурдардий лагерду сакин байссар, спортсментал бигьагулаглай, вардишгу хъанан Буйнакскаллал райондалий. Тиккугу гьармур цалла оьрчIал дайссар, цахва цивппа бурувгун, лази-лакьи хьуну, яшайссар зурдардий. Ми мукун вардиш буллалиссар низамрай яхьун ла­хьхьиншиврул.
Хизри РахIимовлул бусаврийну, микку спортсментурал тарбиялух дуллай бур хъунна­сса къулагъас: къалиян къатIун, цаймигу ххуй дакъасса тIуллахун къабагьан, цалва цивппа бурув­ччуну яхъанан.

Ояма каратэ школалий каратэ лахьлай бивкIун бур цаппара цIа дурксса инсанталгу. Масалдаран, 2000-ку шиннардий миккун занай ивкIун ур ДР-лул Халкьуннал Мажлисрал Председательнал хъиривчу Камил Давдиев.