Дунияллул халкьуннал дянивсса GastroMak 2019 гастрономиялул чемпионатрай хьхьичIра-хьхьичI Аьрасатнал чулуха гьуртту хьуну дур Дагъусттаннал команда Visit Dagestan.
Вай бур республикалул Архитектуралул ва строительствалул министерствалул Дуккаврил центрданиясса оьрчIру-душру.
А. Аьбдуллаева
[dropcap]О[/dropcap]ктябрь зурул 10-нния 14-ннийн бияннин Охрид тIисса Ухссавнил Македониянал шагьрулий хьусса чемпионатрай гьуртту хьуну ур 30 билаятраясса 300 инсан ва 90 судья.
Чемпионатрай Дагъусттаннаясса оьрчIал-душварал цалчинсса кIану бувгьунни «Национал ссупра» тIисса номинациялий. Щала командалул – 8 инсаннал ларсун дур мусил медаллу. Мукунна вайннал ларсун дур мусил ва арцул медаллу «Пицца» тIисса номинациялийгу. Юниортурал командалувусса ХIажи Саэдов, Зайнав Алхаматова, Аида ЖахIпарова ва ПатIимат Кьурбанова чемпионат наниссаксса хIаллай цинявннан ххира хьуну бур.
Дукра даврил бюхъу-гьунар бакъассагу, Дагъусттаннал миллатирттал янналуву вайннал ккаккан дурну дур ххаллилсса «лезгинка», цурдагу чемпионатрал яла оьрмулул чIивимур гьурттучи ПатIимат Кьурбановал балайлухун. Миллатрал мастер-класс ккаккан бувну бур ссурвал Эльмира ва Написат АьлихIажиевхъал, Зайнав Алхаматовал, Евгения Козловскаял.
Гихунмайсса Дуккаврил центрданул кулинар курсирдал программалий бур кулинария ва ингилис маз лахьхьаву. ДакIний бур юниортал Турциянаву, Словениянаву, Хорватиянаву хьунтIисса дунияллул халкьуннал дянивсса бяст-ччаллийнгу тIайла буккан.
[dropcap]Ш[/dropcap]икку кIицI къабувну къабучIир чемпионатрал Дагъусттаннаясса гьурттучитал чIявуми – ссурвал Эльмира ва Написат АьлихIажиевхъул, ХIажи Саидов (Написатлул арс), ПатIимат Кьурбанова (АьлихIажиевхъал ссил Ххадижатлул душ) – Бархъаллал шяравасса бушиву. Сий дусса чемпионатрай ларсъсса ххувшавугу барча тIий, чIа тIий буру вайннан гихунмайгу тIайлабацIу.
