[dropcap]В[/dropcap]ана къуртал хьунни Театрданул шинал А. Къапиевлул цIанийсса Лакрал паччахIлугърал музыкалул ва драмалул театр гьуртту хъанахъисса Дагъусттаннал ва Ухссавнил Ккавкказуллал шагьрурдайнсса гастроллу.
Гоголлул «Ревизор» билаятрал лавайсса дуккаврил идарарттал ва школарттал программалувун бухлай бухьувкун, ккаккан буллай буссия му дуклаки оьрчIал ва студентътурал аудиториялун.
Гъирарай ххал бунни спектакль жагьилтурал Дарбант, Избербаш, Хасавюрт, Нальчик шагьрурдай.
Махъва-махъсса аьрххи хьунни Грознай шагьрулийн, спектакльданул режиссер-постановщик Руслан Хакишевлул ватандалийн.
Театрданул директор МахIаммад ХIусайновлул бувсунни Лакрал театрдания ва Аьрасатнал халкьуннал артист Руслан Хакишев ушиву театрданун ччянива мачча хьусса режиссер. КIицI лавгунни тIайлабацIусса хьушиву «Ревизор» спектакльданущалсса гастроллу.
Ва мукунма театрданун тIайлабацIусса хьушиву ванал бивхьусса «Скапеннул хIилларду» ва «Хан-Муртазааьли» спектакллу.
Гъирарай ххал бунни спектакль чачаннал дуклаки оьрчIал ва студентътуралгу.
Лажин хIадур дурссар
Зулайхат Тахакьаевал
