Анвар Гьарунович Гьарунов (1926-2011) хъанахъиссар Да­гъусттаннал ва билаятрал цIадурксса педагог-цIушинначи. Байбихьулул школалий теориялул, методологиялул ва оьрчIал дарсирдал ва тарбиялул методикалул авторди. Га ивкIссар цIуну за ляхъан даврил пикри-зикрилийсса, элмулийн ва ватандалийн дакI тIайласса аьлимчу, патриот ва гражданин.

Ахттарчи ва цIушинначи хIисаврай ганан хасну бия цIушиннардал асарду, интуиция, ялун бучIанмур хьхьичIва кIул шаву. Учительтуралгу учитель Э. Гь. Гьарунов ия педагогикалул элмурдал кандидат, профессор, 100-яргу ххишаласса элмийссагу, методикалул хIакъиравуссагу давуртту дурсса.
Ганал яла агьамми давуртту хъанахъиссар: «Пути совершенствования учебного процесса в начальных классах с многонациональным составом учащихся», «Начальное обучение в Дагестане в условиях школьной реформы», «Нравственное воспитание школьников» ва цаймигу. Миннуву ккаккан бувну бур байбихьулул школалий захIматну щаллу бан шайсса 5 масъала.
Э. Гь. Гьаруновлул тамансса ахттарбавуртту дурссар дидактикалул гьануми масъаларттан хасну, ляличIинува Дагъусттаннал чIявумиллатру бусса шяраваллал школардал тагьарданувусса байбихьулул классирттаву.
Ганал хъунмасса хIаллай дарсру дирхьуссар байбихьулул классирттаву, зий ивкIссар ду­ккаврил учреждениярттал каялувчину, Дарбантуллал ОНО-рал хъунаману.
А. Гь. Гьаруновлул пагьму, бюхъу лапва яргну ялун ливчу­ссар га Дагъусттаннал педагогикалул институтравун зун кьамул увсса чIумал.
Га эбратну зий ивкIссар хъунама преподавательну, доцентну, байбихьулул дарсирдал кафедралул хъунаману. А. Гьарунов хIурматрай ивкIссар студентътурал, цалва даврил уртакьтурал дянив. Га ия дакI хъинсса, ххаллилсса инсан.
Дагъусттаннай байбихьулул дуккаврил агьамсса масъалар­ттал хIакъиравусса элмийсса ва практикийсса конференцияртту, семинарду мудансса гъирарай, лавайсса элмийну-методикийсса даражалий шайсса бивкIссар, Гьаруновлул байсса бивкIун тIий. Ганал кафедра яла ххуйминнувасса ца хьуну бия институтраву.
Махъсса шиннардий га цалва школалул дуклаки оьрчIащал архIал чялишну зий ивкIссар дарсирдал ва тарбиялул ишир­ттал масъаларттаха ва шяраваллил школардал учительтурал кIулшиврул даража лавай баврил масъаларттаха.
Ганал пикрилий, аьркинну бур цалчин ирглий студентътурал кIулшиву ва педагогшиврул даража лавай буллан. Му даву дуллан аьркиншиву кIул шай жагьилсса учительтал, педколледжру ва педвузру къуртал бувну, школардаву дарсру дихьлай байбивхьусса чIумал.
ЧIярусса шиннардий ганал ххаллилну каялувшиву дуллай ивкIссар РСФСР-данул педагогикалул обществалул Дагъус­ттанналмур отделениялул байбихьулул дуккаврил методикалул секциялий.
ЧIявусса лекцияртту бу­ккайсса бивкIссар республикалул зунттал районнал байбихьулул школардал ва классирттал учительтурахь.
Ватандалул ганал дурсса давурттан лавайсса кьимат бивщуну бур. Ганан дуллуну дур «Отличник народного образования РФ» тIисса лишан, «Дагъусттаннал ва Аьрасатнал Федерациялул лайкь хьусса учитель» тIисса цIарду, «За оборону Кавказа», «За доблестный труд в годы Великой Отечественной войны» тIисса медаллу.
И. Г. Багъиров, доцент ХIадур бувссар ХI. Аьдиловлул