Лакрал райондалул школарттал дянив хьхьичIунми школарттал сияхIраву бур КIундиннал школа. 2008 шиная шихунай школалул директорну зий ур Дагъусттан Республикалул лайкь хьусса учитель, райондалул хьхьичIунсса биолог Гуйдалаев Абакар ХIамзатлул арс. Ва школалий зий гьашину ванал хъанай дур 30 шин. Къуртал бувну бур Дагъусттаннал паччахIлугърал университетрал биологиялул факультет.
Школалий дуклай ур 70 дуклаки оьрчI. Цалчинмур классравун увкIун ур 5 дуклаки оьрчI.
З. Тахакьаева
«Къатлул заллу ци багьу-бизулул, ци тIул-тIабиаьтрал инсан уссарив кIул шайссар къатлул бухкIулу лахъаннинма», учай жула. КIундиннал школалий ххуйсса каялувчигу, зузалтгу зий бушиву ттунгу школалул хIаятравун бухханнинма бувчIуна. Архнияра иттав ххяхлай дия хIаятрал лагма-ялттусса марцIшиву. НакI руртIуну хIачIанну дур хIаят, хIаятрал чIаравсса ахъ. Школалул ччуччиялунсса кIану, лагма чапар дурну, личIи бувну бур. Шикку хаварбакъулий бакIрайн агьсса зузала цаягу акъахьунссар, цинявппагу цалва пишагу, оьрчIругу, буттал кIанугу дазу-зума дакъа ххирасса инсантал бухьунссар, тIисса пикри хIасул хьунни бакIраву, директор ва учительтал цивппа ххал хьуннинма. Къахъяврин бувну бияв на асардал. Школалул жанахIравун буххайхтугу хъиннува мукIру хьура ва школалий хъинну захIмат ххирасса пишакартал зий бушиврий. ЧIирттай стенд дакъасса мурцIувагу бакъар. Стендру дур оьруснал хъунасса шаэр Александр Пушкиннун, Дагъусттаннал Халкьуннал шаэр Расул ХIамзатовлун хас дурсса, школалул къатри цIудурсса ва кIилчинмур корпус бувсса, чIярусса шиннардий директорну зий ивкIсса МахIаммадов Санинан хас дурсса, личIи-личIисса шиннардийсса школалул лахIзардая бусласисса. Наварив террордания жяматрансса нигьачIаврия бусласисса ва 2004 шинал Бесланнай хьусса дуниял зурзу чин дурсса терактран хас дурми стендирттачIа лахъи лавгунав. Бур мурцIурду наркоманиялия буруччаврия ва ххуллурдай низам дуруччаврия бусласисса.
Дарсирдал кабинетру бур учительтурал цалва захIмат бувну, цимурцаннул лащу-щаллу бувсса. ЗахIматран лархьхьуссар хIасиллугу шайсса. Райондалий цавагу конкурс къашайссар ва школалул учительтал гьуртту къавхьусса ва хьхьичIунсса кIану къабувгьусса: «Лучший учитель года» – биологиялул учитель Гуйдалаев Абакар ва Абакарова Абризат; «Лучший учитель родного языка» — Шихлаева Абризат; «Самый классный классный» — Хуцаева Миясат; «Лучший вожатый года» — Узданова ПатIима. Ларгсса дуккаврил шинаву райондалий хьусса Расул ХIамзатовлул юбилейран хас бувсса «Гостиная Расула Гамзатова» тIисса, шаэрнал творчествалиясса тIиртIусса дарсирдал конкурсрайгу цалчинмур кIану бувгьуссар ва школалул оьрус мазрал ва литературалул учительница Абакарова Абризатлул.
Нажагьсса бухьунссар школартту тарихрал ва краеведениялул музейрду бусса. Ва школалий тIурча бур тарихрал учитель, Аьрасатнал Федерациялул аьмсса кIулшиву дулаврил бусравсса зузала Шихлаев Аьбдуллул сакин бувсса музей. Шиву дур кIундиннал усттартурал дурсса, цIанакул жунна хъамадитала хъанахъисса, ужагърал кьай-кьуй, къурнил ярагъ. Ялун нанисса никираву нажагьссавагу бакъахьунссар вай затурдин цIарду кIулсса. Шикку тIурча вай, ядаврицIун, дуклаки оьрчIан ккаккиялунгума дирхьуну дур.
Хъун дяъвилий талай бивкIсса учительтурал аьпа хIурматрай ябуллай бушиву буслай бур вайннан хас бувсса альбомрал. Альбом бавтIун бур Кирогвардеский областьрай талай ивкIсса Кайнаев МахIаммадлул, дяъви къуртал хьусса шинал увкIун, 1995 шиналнин зий ивкIсса Абачараев ЩайхахIмадлул, щаву дирну зана хьусса Хъунбуттаев МахIаммадлул, Маммаев Тажуттиннул дакIнийн бичавурттая.
Ттигъанну хьусса райондалул кIулшиву дулаврил зузалтрал августовское совещаниялий «Итххявхсса оьрчIащалсса даврия» ихтилат бан гьамин ва школалул директорнайн тапшур бувссагу шикку бунияла му масъала ца яла агьаммурну ккаклай буну тIий бухьунссар. Хъуннасса чIун ккаккан дурну дур шикку личIи-личIисса кружокирттан. Масалдаран, Дагъусттаннал лайкь хьусса учитель Хуцаев Надиршагьлул кружок дур ниттил маз яла ххирамурну бикIан аьркиншиву кIул буллалисса. Школалул директор Гуйдалаев Абакардул кружок дур буттал кIанттул тIабиаьт дуруччин лахьхьин буллалисса. Школалий ччя-ччяни дувай чIелмултран хас дурсса био-КВН, орнитологиялул семинарду.
Школалий лакку мазрал дарсру дихьлахьисса ва мунищалва архIал библиотекалийгу зузисса Шихлаева Абризатлул сакиншиннарайну гьарца шинал дайсса дур «Халкьуннал аькьилшиврий яхъананну» тIисса фольклорданул байран. Гьарца шинал сентябрь зуруй дайсса дур «КIяла кьурукьирттал кьинирду».
Школалул дуклаки оьрчIру чялишну гьуртту шай райондалул ва республикалул олимпиадарттай, конкурсирдай, конференциярттай. Ларгсса дуккаврил шинал республикалул оьрус мазрал олимпиадалий кIилчинмур кIану бувгьуну бур 9- мур классрал дуклаки душ ХIажиева Раминал. «Шаг в будущее» тIисса республикалул конференциялий 11-мур классрал дуклаки душ ХIасанова ПатIиматлул бувгьуссар 3-мур кIану. Ванил доклад бия «История развития Лакского района и путь вывода из кризиса» тIисса темалун хас бувсса (каялувчи Гуйдалаев Абакар). Биологиялул олимпиадалийгу ва яла хьхьичIунсса ххюннал сияхIравун багьссар. Мукунма ва школалул дуклаки оьрчIру яла хьхьичIунсса ацIуннал сияхIравун багьайсса бур тарихрал олимпиадарттайгу.
Лавайсса даражалий дирхьуну дур шикку художествалул самодеятельностьрал давугу. Гьарца шинал «Очаг мой Дагестан» конкурсрал райондалул этаправу гьуртту хьуну, школалул къавтIаврил ансамбльданул бугьайссар хьхьичIунсса кIану. КъавтIаврил кружок дихьлай бур Ибрагьимова Жасмира.
«Гьарца оьрчIал дакIниву дуссар чIакъачIалачIисса синтту. Миннуйн бюхъу бусса ка лаярча, ххуйну руцлан дикIайссар» тIисса хъунасса педагог В. Сухомлинскийл махъру КIундиннал школалий чIявусса учительтурал девизну хьуну бур.
Ва школа райондалий хьхьичIунну бур спортравугу. Райондалул школарттал дянивсса гьарцагу бяст-ччаллай вайннал дуклаки оьрчIру цалчинминнавух буссар, хаснува волейболданул, футболданул ва настольныйсса теннисрал турнирдай. ШколалучIа бур спортрал хасъсса школа. Муний каялувшиву дуллай ур 1986 шиная шихунай школалий физкультуралул дарсру дихьлахьисса Ибрагьимов ХIашим. Миккун занай бур ряхцIалунничIан бивсса оьрчIру. КIундиннал школалул дуклаки оьрчIру ва душру итххявхсса бур лечавриву ва тIанкI учавриву.
