Дайдирхьунни цIусса 2013-2014 дуккаврил шин. Каникуллай, кIани-кIанттайх кIама бивщуну, бигьалаглай бивкIун, гъинтнил шанмагу зуруй къаккавксса архIал дуклакиминнахгу, ххирасса учительтурахгу, цалва кIилчинмур къаттану хъанахъисса школалухгу мякь бувксса оьрчIру ххарину най бия школданийн.
Бадрижамал Аьлиева
Щалвагу Аьрасатнаву кунна, МахIачкъалаллал шагьрулул 22-мур школа-лицейрал хIаятравугу дия хъуннасса уттарашинна. КIяла-лухIисса яннарду лархсса, тIутIал кацIру, ссихIирал шарду каруннил бувгьусса оьрчIал, миннал нитти-буттал дурцIуну дия школданул хIаят. Низам дуручлай, цалва пишакаршиврул бурж биттур буллай бия полицанал зузалтгу.
Дуклаки оьрчIру, хаснува 1-мур классравун нанисса мюрщулт ва миннал нину-ппу, КIулшивурттал кьинилущал барча буллалисса махъ лавхъуна шагьрулул КIулшиву дулаврил методист Е. Степановал. Хъирив оьрчIал ккаккан дунни хъундакъасса концерт. 11-ми классирттал дуклаки оьрчIал школданул хIаятравун дахьва ва кьини бувхсса 1-ми классирттал мюрщултрахьхьун дуллунни КIулшивурттал кIулли, минналгу махъ буллунни ххуйну дуклан. ОьрчIачIан ва кьини магьлува хъамалу бувкIун бия Маша ва Цушагу. Миннащал оьрчIал диялсса тяхъашиву дунни, къавтIун бивзунни. Миннахьхьунгу махъ буллунни ххуйну дуклансса.
Ахирданий 22-мур школа-лицейрал директор Анатова Саламатлухьхьун буллунни махъ. Цилва ихтилатраву ванил кIицI ларгунни ларгсса дуккаврил шин школалун тIайлабацIусса диркIшиву, цIуну дайдирхьумургу мукуннасса дикIантIишиврий дакI дарцIуну бушиву, бувсунни гьарца шинал ва школалийн бучIайшиву дуклан чIявусса цIусса оьрчIру ва цивппа ххарину бушиву ми кьамул буван бавкьусса, нахIусса кулпатравун – 22-мур школа-лицейравун. Саламат Закарияевнал чIа увкунни дуклаки оьрчIан дуккавриву тIайлабацIу, учительтурангу – ссавур ва, учительнал цIанин лайкьну, цалва бусса гужгу, кIулшивурттугу щаллуну дуллай оьрчIан, цалва пишакаршиврул бурж лавайсса даражалий биттур буллалаву.
Сир-сир тIий дайдирхьусса гъаралуннил чансса анавар дуккан дунни цIусса дуккаврил шин дайдишаврицIун дархIусса батIаву. Гьаваллавун ссихIирал (хияллал шарикру тIий бур вайннуйн) шарикругу итабавкьуну, бивщусса Цалчинсса гюнгутIуцIун хьхьичI 1-ми классирттавун наними, хъирив 11-ми классиртталми оьрчIру, цинявппагу бувххунни школалувун.
ТIайлабацIусса, ххуйсса шин хьуннав цинявннаннагу.
