Августрал 24-нний «Дагестан» ГТРК-лул каналданий ДР-лул Президентнал кIанайсса Рамазан АьбдуллатIиповлул тIайланнасса эфирданий жавабру дуллунни журналистътурал ва республикалул инсантурал буллусса суаллахьхьун.

ХIасан Аьдилов
ХьхьичIмахъ лахълай, Рамазан АьбдуллатIиповлул кутIану бувсунни ихтилат ссал хIакъираву бикIантIиссарив: «Гьарца ишираву ккаккан дан аьркинссар приоритетру, яни агьамми масъалартту, гай щаллу бансса ххуллу-ххару. Аькьилчунал увкуну бур: «Агарда инсан чунчIав гьузуй акъахьурча, ганан тIайлабацIу къашайссар». Мунийн бувну, агарда жува хьхьичIунмай хъанай ччарча, Дагъусттан кризисрал тагьарданува бувккун ччарча, жунма кIулну бикIан аьркинссар Дагъусттан ци тагьардануву бу­ссарив.
Мукунсса анализ дурссар проектру хIадур дуллалисса чIумал. Республикалун, ттул пикрилий , яла агьаммурну хъанай дур агропромышленный комплекс лябуккан баву. АПК, хаснува ризкьи ябаву ва къюмайтIутIи ххяххан баву, жулла республикалун аьдатравун багьсса бутIа хъанахъиссар. Микку зузи кIанттурдугу тамансса ххи хьунтIиссар.
На АьФ-лул Президент В. В. Путиннущал хьунаавкьусса чIумал, на ганахь бувсъссия Дагъусттан хьхьичIунмай хъит учин бансса цаппара ххуллурдая. Мукунсса бия 3 ххуллу. Миннувасса ца бия финансирттал, технологиярттал операторну ккаккан бан Росагролизинг. На тавакъю бувссия АьФ-лул Президентнахь Росагролизинграл уставрал фондран дулун 9,5 млрд. къурушру, Дагъусттаннай цаппара агропромышленностьрал проектру ишакаш даншиврул.
Стратегикийсса советрал каялувшиврулу жу дузал барду ХьхьичIуннайшиврул корпорация. ГаницIун кабакьлай бур цаппара министерстварттал ва банкирдал. Корпорациялул даву хъанахъиссар инвестициярду кIункIу даву…
Республикалул бакIчинахь МахIачкъалаллал инсантурал бувсунни рязи бакъа бушиву шагьрулий дукиягу, транспортгу ххирану душиврий.
ДР-лул Президентнал кIа­найманал жавабран бувсунни шагьрулий тамансса къулайшивуртту духлаган дурну душиву, миннувух – жяматийсса транспортгу. Ганал мукъурттийн бувну, шагьрулий бур азарвахъул маршруткартту, амма цила дагьайкунсса жяматийсса транспорт дакъар. Му масъала контрольданулун лавсун бур. Ми масъаларттаха зий бур.
Дукиялул хIакъираву тIурча базаллувун буххансса иш бакъар. Ти­кку бур къудурсса оьрчIру базаллул ялув бацIаву дуллай. Га дур мафия. Мунияту утти базардан кIантай дуллантIиссар агроплощадкарду. Тукунсса площадкарду дурну дур Хасавюртлив ва Буйнакскалий. Тикку багьригу ялавайсса буссар, цанчирча бакIлахъия дахлай буну тIий гай ххяххан дурми.
Суаллу буллай бия личIи-личIисса масъаларттал хIакъираву, бия Дагъусттаннал приоритетсса проектирдал, чани чанминнан бигьалаган хьхьиричIа кIану личIи баврил, арсру бавцусса нитти-буттахъал рязи бакъашивурттал, МахIачкъалалив кIирисса щин дакъашиврул, вузру къуртал бувми кьатIув лаглагаврил хIакъиравусса ва цаймигу. Миннухьхьун Рамазан АьбдуллатIиповлул балжисса жаваб­ру дуллунни.