Ларгсса нюжмардий МахIачкъалалив хьунни хIукуматрал ва политикалул жяматийсса ишккакку АьбдурахIман Данияловлун 105 шин шаврин хас дурсса митинг. Ва кьини хьхьирицIсса паркравун Аь. Данияловлул гьайкалданучIан бавтIун бия чIявусса халкь.
Бадрижамал Аьлиева
Ва митинг тIитIлай, ДР-лул ХIукуматрал председательнал цалчинма хъиривчу Анатолий Карибовлул бувсунни Данияловлул оьрмулия ва даврия, 30-нния лирчусса шиннардий му зий ивкIшиву республикалий хъунисса къуллугъирттай, мукуна мира шиннардий ивкIшиву Дагъусттаннал обком партиялул цалчинма секретарьну. Данияловлул цIаницIун бавхIуну бур республикалий цалчинсса ГЭС-ру – «Сулакьуллал гидроэнергетикалул каскад», хъунисса промышленностьрал предприятияртту, СССР-рданул Элмулул академиялул Дагъусттанналмур филиал баву, Дагъусттаннал паччахIлугърал университет тIитIаву.
Гихунмай махъру лавхъунни тарихрал элмурдал доктор АьбдуллатIип ХIажиевлул, МахIачкъалаллал администрациялул бакIчинал хъиривчунал буржру чIумуйну биттур буллалисса Татьяна Гамалейл, тарихрал элмурдал доктор, ДГТУ-рал тарихрал кафедралул профессор Амин Аьлиевлул, «Гунибский район» МО-рал бакIчи Пахруттин МахIаммадовлул. Гьарцанналгу ваная учинмур, бусанмур чIявуя.
Ахирданий бавтIминнал тIутIив дирхьунни АьбдурахIман Данияловлул гьайкалданучIа.
