Февральданул 19-нний Дагъусттаннал УФАС-рал (Управление Федеральной Антимонопольной службы) каялувчи Кьагьир Бабаев хьунаавкьунни республикалул журналистътуращал. Пресс-конференциялий мунал бувсунни Дагъусттаннал УФАС-рал 2018 шинал дурсса давурттал хIасиллая.
УФАС-рал каялувчинал тIимунийну, 2018 шинал Дагъусттаннал антимонопол къуллугърал законну лиян даврихлу аькIри дирхьуну дур 71,9 млн. къурушрансса. Административ жаваблувшиврийн кIункIу увну ур 241 къуллугъчи, 31 идара (юридическое лицо) ва 2 инсан. ЧIяруми аькIри дирхьуну дур антимонопол законну лиян даврихлу – 61,8 млн. къуруш (2017 шинал – 12,3 млн. къуруш). Цинярда аькIравату 900 азарда къуруш аькIрал дирхьуну дур властрал органнал къуллугъчитурай. ПаччахIлугърал хъус ласаврил бутIуву 9,7 млн. къуруш аькIрал дирхьуну дур (2017 шинал – 5,7 млн. къуруш).
2018 шинал Дагъусттаннал УФАС-рал тIиртIуссар 83 дело (2017 шинал – 119) «О защите конкуренции» тIисса федерал закон лиян даврийну, миннувату 6 дацIан дурссар закон лиян дурсса ишру бакъа тIий. Ми деларду тIиртIуну диркIссар УФАС-рал сипталийну ва инсантурая бувкIсса аьрзарду гьануну лавсун. Миннувасса чIяруми деларду дур личIи-личIисса даражарттал — муниципалитетирттал, газрал ва энергетикалул компаниярттал хIакъираву.
Шагьрурдай антимонопол законну чIяруну лиян дуллай бур аьрщарал участокру ишла даврил чулуха, районнай тIурча – аьрщарал участокру ижаралий ласаву машай дуккан дуллалисса чIумал. ДукIу Дагъусттаннал УФАС-рал чирчуссар 47 предписание, антимонопол законну лиян дуллалисса ишру хьун къабитаву мурадрай. Мукунсса 15 чагъар чивчуну бивкIссар ДР-лул Росимуществалул управлениялийн, 10 Дарбантуллал, 5 МахIачкъалаллал ва 4 Каспийскаллал администрациярттайн.
ХIадур бувссар
ХIасан Аьдиловлул
