[dropcap]Ф[/dropcap]евральданул 11-нний ДР-лул ХIукуматрал Председатель Артем Здуновлул каялувшиврий хьунни рес­публикалий инвестицияр­ттал проектру дузрайн ду­ккан даврил хIакъиравусса батIаву.

Муний ххал диргьунни 5 проект: ЦIуссалакрал райондалийсса агропарк «Ттул Дагъусттан», Ленинккантлив «Агромир» тIисса теплицардал комплекс баву, «Стекловолокно ва муния кьай-кьуй даву», Каспийскалий «Полиэтиленну баву ва муния кьай-кьуй даву», МахIачкъалалив Лениннул комсомолданул паркираву «Колесо обозрения» аттракцион тIитIаву.

Артем Здуновлул тIи­мунийну, ми инвестициярттал проектру дузрайн дуккан даврил ялув бацIаву дуван аьркинссар цаппара министерстварттал цалархIал.

Проектру дузрайн ду­ккан дуллалаврил хIакъираву бувсунни ДР-лул ишбажаранчишиврул ва инвестициярттал агентствалул каялувчи ХIажи ХIасановлул. Мунал бусаврийну, «Агромир» тIисса проектрайну буллалиссар ттизаманнул теплицардал комплекс, микку щалла шинал мутталий ахънилсса дугьлантIиссар 10 гектарданий. «Пюрунтрал ххаллу ва  муния кьай-кьуй даву» тIисса проектрайну бантIиссар ттизаманнул цIусса технологияртту ишла дурну пюрундалул ххаллу дуккан дайсса, яла миннуяту промышленностьран технический янна щащайсса завод. «ДагПолимер» ООО-лул Каспийскалий буккан буллантIиссар полиэтиленну. «Ттул Дагъусттан» агропаркирай дузал бан тIий бур 7 азара инсаннансса зузи кIану. МахIачкъалалив «Колесо обозрения» тIитIаврил проектрах вичIи дирхьуну махъ, Артем Здуновлул бувсунни му ма­съалалул хIакъираву агьалинал пикри-зикрирду хIисавравун ласун аьркинну бушиву.

Хьунабакьаврий гьур­тту хьуминнал ххал бивгьунни проектру дузрайн дуккан даврийн багьайсса  агьамми масъалартту ва ккаккан бунни ми дузал бансса хху­ллурду. Микку гьуртту хьунни ДР-лул ХIукуматрал Председательнал 1-ма хъиривчу ХIажимахIаммад ХIусайнов, ДР-лул ХIукуматрал Председательнал хъиривчу, ДР-лул шяраваллил хозяйствалул ва бакIлахъиялул министр Аьбдулмуслим Аьбдулмуслимов, цаппара министерствар­ттал ва ведомстварттал каялувчитал, проектирдал сиптачитал.