Январьданул 30-нний премьерминистр Артем Здуновлул каялувшиврий хьунни ДР-лул ХIукуматрал батIаву.

Муний ххал бивгьунни ДР-лий миллатирттал паччахIлугърал политика дузрайн дуккан давриву республикалул ишру бартбигьаврил органнал ва муниципал сакиншиннардал органнал хIалагьурттушиврул хIакъиравусса масъала.

Му масъалалия хъунмур махъ лавхъунни ДР-лул миллатирттал политикалул ва диннал иширттал министр Татьяна Гамалейл. Мунил тIимунийну, му даврий ца яла агьаммур задачану хъанахъиссар АьФ-лул Дагъусттаннайсса ПаччахIлугърал миллатирттал политикалул стратегия бартдигьаврил бутIуву муниципал сакиншиннардал администрациярттащал системалийнусса хIала-гьурттушиву дузал даву. «Муниципал властьрал органнащал мюнпатсса хIала-гьурттушиву дузал хьуншиврул, 2013-2014 шиннардий циняв муниципал сакиншиннардащал кьутIирду чирчуну диркIссар республикалий миллатирттал дянивсса арарду цIакь даврил ва лядуккан даврил бутIуву.

Мува масъалалул хIакъираву ихтилатру бунни ДР-лул культуралул министр Зарема Буттаевал, ДР-лул информатизациялул, дахIаврил ва массовый коммуникациярттал министр Сергей Снегиревлул. ХIукуматрал батIаврий ххал бивгьунни цаймигу масъалартту.

ХIадур бувссар ХI. Аьдиловлул